Tags-Phool

hai mire sher meñ kuchh us kī shabāhat varna
phuul kyā chiiz haiñ kaliyoñ kī sabāhat kyā hai

chand be-zor shajar chand khilā.e hue phuul
aur gulchīñ kī gulistāñ pe ināyat kyā hai

maiñ likh rahā thā phuul kī pattī pe terā naam
kāñTe kī nok sīna-e-gul meñ utar ga.ī

ham soch rahe haiñ muddat se ab umr guzāreñ bhī to kahāñ
sahrā meñ ḳhushī ke phuul nahīñ shahroñ meñ ġhamoñ ke saa.e haiñ

mujhe dhuup meñ tū qarīb kar mujhe saaya apnā nasīb kar
mirī nik.hatoñ ko uruuj de mujhe phuul jaisā vaqār de

ye chalī hai kaisī havā ki ab nahīñ khilte phuul milāp ke
kabhī daur-e-fasl-e-bahār thā tumheñ yaad ho ki na yaad ho

lahad pe aa.e the do phuul bhī chaḌhā jaate
abhī tak aap meñ bū-e-vafā nahīñ aatī

phal aate haiñ phuul TūTte haiñ
ḳhurdoñ se buzurg chhūTte haiñ

mausam-e-dil jo kabhī zard sā hone lag jaa.e
apnā dil ḳhuun karo phuul ugāne lag jaao

hinā kā rañg ye hargiz nahīñ hai sach batā zālim
ye kis kā phuul sā dil tū ne paañv se masal Daalā

kisī ahl-e-dard se pochhiye zarā is chaman kā mo.āmla
vo chaman ki fasl-e-bahār meñ bhī jahāñ pe phuul khile na the

ik to vo phuul hī kāġhaz ke uThā letā hai
is pe ye zid hai ki in phūloñ se ḳhushbū aa.e

chāhtā hai dil kisī se raaz kī bāteñ kare
phuul aadhī raat kā āñgan meñ hai mahkā huā

phuul nargis ke gire shāḳh se Daalī jo nazar
terī āñkhoñ kī itā.at meñ haiñ saarī āñkheñ

jis ne dāman thāmā hogā
phuul nahīñ vo kāñTā hogā

ye ḳhvāb hote hue sahīfoñ ke phuul mere liye haiñ lekin
zamīn-e-dil par ye āyatoñ kā nuzūl ik dahr ke liye hai

sochoñ ko tar-o-tāza rakkhā 'shabnam' tire paiham ashkoñ ne
hairat hai ki ahd-e-ḳhizāñ meñ bhī ye phuul nahīñ kumhlā.e haiñ

mahakte phuul bhī Dasne lage haiñ saañp kī sūrat
fazā bāġhoñ ke andar bhī diloñ ke mausamoñ se hai

dast-e-ḳhizāñ ne baḌh ke vahīñ us ko chun liyā
jo phuul gir gayā nigah-e-andalīb se

kuchh phuul khil rahe haiñ sar-e-shāḳh-e-mai-kada
tum hī zarā ye phuul chuno maiñ nashe meñ huuñ