Tags-Phool

phuul dekhā thā ḳhvāb meñ kal ik
aaj tābīr-e-ḳhvāb ho jaa.e

phuul jhaḌte haiñ us kī bātoñ se
vo nahīñ hotā lab-kushā yūñhī

guftugū hogī tirī ḳhud se kisī ke lab par
tū kisī roz kisī phuul ko chhū gaañv meñ

aag ke phuul to bujh jā.eñge lekin 'shahzād'
maiñ sulagtā huā gul-dān meñ rah jā.ūñgā

kahtī hai os phuul se o be-ḳhud-e-nashāt
rū-e-ḳhizāñ bhī zer-e-hijāb-e-bahār hai

shā.erī phuul khilāne ke sivā kuchh bhī nahīñ hai to 'zafar'
baaġh hī koī lagātā ki jahāñ khelte bachche jā kar

hamāre dil meñ koī aarzū nahīñ baaqī
hamāre phuul meñ ab rañg-o-bū nahīñ baaqī

rūh-e-bulbul ne ḳhizāñ ban ke ujāḌā gulshan
phuul kahte rahe ham phuul haiñ sayyād nahīñ

be-ḳhabar mujh se mire dil meñ hamesha hañstā
phuul nargis kā surāhī meñ akelā hañstā

ġhairoñ ke saath chhoḌ ke tum naqsh-e-pā chale
kyā ḳhuub phuul gor pe merī chaḌhā chale

phuul hoñToñ pe hañsī ke haiñ mahakte hue 'shāz'
aur sāñsoñ meñ sharāre liye phirtā huuñ maiñ

vo kaun sī sahar thī ki roī na phuul phuul
vo shaam kaun sī thī ki ġham se lahū na thī

duā karo ki ḳhizāñ meñ hī chand phuul khileñ
ki ab ke mausam-e-gul meñ gulāb aa.e nahīñ

kisī kī zulf meñ dekhā to ham ko yaad aayā
ki ek phuul usī rañg kā hamārā bhī thā

zaḳhm purāne phuul sabhī baasī ho jā.eñge
dard ke sab qisse yād-e-māzī ho jā.eñge

ḳhafā thī shāḳh se shāyad ki jab havā guzrī
zamīñ pe girte hue phuul be-shumār dikhe

zamīn ko phuul fazā ko ghaTā.eñ detā hai
mujhe falak se vo ab tak sadā.eñ detā hai

phuul se chehre shāḳh sī bāñheñ jab galiyoñ meñ miltī haiñ
kaun bhalā phir sair ko jaa.e hare-bhare gulzāroñ meñ

bharī paḌī hai ufūnat se inch inch zamīñ
is ek phuul kī ḳhushbū kidhar kidhar jaa.e

boltī ho to yuuñ hai jaise phuul pe titlī Doltī ho
tum ne kaisā sabz kiyā hai aur kaise vīrāne ko