Tags-Phool

aayā basant phuul bhī sho.aloñ meñ Dhal ga.e
maiñ chūmne lagā to mire hoñT jal ga.e

phuul joḌe meñ sajāne ke liye hote haiñ
phuul paanī meñ bahāne kī zarūrat kyā hai

araq-ālūd aap kā chehra
ho dhulā phuul jaise shabnam se

har roz paḌe hote haiñ sab phuul zamīñ par
ye kaun girā detā hai gul-dān hamārā

koī phuul devī ke charnoñ tak aayā
kahīñ muntashir pattiyāñ ho rahīñ haiñ

peḌoñ meñ chhāñv phuul meñ ḳhushbū hai apnā rañg
vīrānī baḌh ga.ī hai ki bastī nahīñ rahī

silsila ḳhushbūoñ se rakhtī huuñ
mujh ko ik phuul se mohabbat hai

phuul haiñ rañg haiñ bahāreñ haiñ
zindagī kitnī ḳhūbsūrat hai

vo jo phuul the tirī yaad ke tah-e-dast-e-ḳhār chale ga.e
tire shahr meñ bhī sukūn hai tire be-qarār chale ga.e

'shād' is tarah se aaj kiyā us ne mujh ko 'shād'
dekho to phuul ban ga.e khil kar kalī se ham

kahīñ ugā ho vo gulshan ho yā ki sahrā ho
hamesha phuul kī ḳhushbū se vāsta rakhnā

maiñ ne jo kiyā fasl-e-bahārāñ kā taqāzā
ik phuul kī tasvīr dikhā dī ga.ī mujh ko

kyuuñ na dil-e-ḳhizāñ-nasīb har gul-e-tar ko chuum le
aaj to phuul phuul meñ zā.iqa us ke lab kā hai

ajab nahīñ ki chaman-dar-chaman bane har phuul
kalī kalī kī sabā jā ke god bhar aa.ī

phuul the in meñ magar ḳhushbū na thī
lafz ko sūñghā uThāyā rakh diyā

badan badan ḳhushbū phailī hai
ghuñghaT ghuñghaT phuul khilā hai

hazār barq gire laakh āñdhiyāñ uTTheñ
vo phuul khil ke raheñge jo khilne vaale haiñ

ik phuul hai gulāb kā aaj un ke haath meñ
dhaḌkā mujhe ye hai ki kisī kā jigar na ho

ḳhushk havāoñ ne bhī kitne sūkhe phuul girā.e
dhartī ne jab ruup sajāyā bahut dinoñ ke ba.ad

ishq kā jaadū kyā hotā hai ham se pūchho
dhuul meñ mil kar phuul khilānā ishq meñ sīkhā