Tags-Phool

ufuq pe phuul vafāoñ kā jab huā raushan
sisaktī shab ke lahū ko sahar meñ rakkhā gayā

ek samay tirā phuul sā nāzuk haath thā mere shānoñ par
ek ye vaqt ki maiñ tanhā aur dukh ke kāñToñ kā jañgal

aañsū nikal rahe haiñ tasavvur meñ ban ke phuul
shādāb ho rahā hai gulistān-e-ārzū!

jhoñke aate haiñ bū-e-ulfat ke
phuul yārab haiñ kis kī turbat ke

khilā de phuul mere baaġh meñ paiġhambaroñ jaisā
raqam ho jis kī peshānī pe ik aayat bashārat sī

chaman se kyuuñ na shikāyat ho 'shād' rañgoñ ko
har ek phuul agar ḳhushbuoñ meñ gum ho jaa.e

mire dāġh-e-jigar ko phuul kah kar
mujhe kāñToñ meñ khīñchā jā rahā hai

mirī band palkoñ par TuuT kar koī phuul raat bikhar gayā
mujhe siskiyoñ ne jagā diyā mirī kachchī niiñd uchaT ga.ī

mohabbat hai munj jiiv chaman kā so merā
prit phuul rañg rañg ke us kī nishānī

chāñdnī phuul havā jaam sitāre ḳhushbū
zahr ke naam haiñ jis shab nahīñ hotā koī

muqaddar phuul haiñ yā Thokareñ phir
kisī patthar meñ Dhal kar dekhtā huuñ

sūrat-e-bād-e-sabā qāfila-e-yād aayā
zaḳhm-dar-zaḳhm khile phuul se mere dil meñ

dubkī huī thī gurba-sifat ḳhvāhish-e-gunāh
chumkārne se phuul ga.ī sher ho ga.ī

do jīvan tārāj hue tab puurī huī baat
kaisā phuul khilā hai aur kaisī vīrānī meñ

phuul khilne ko to naqqāsh khile ḳhvāb magar
mere zaḳhmoñ ke chaTaḳhne kī sadā ho goyā

lahū ke phuul ḳhizāñ āshnā nahīñ 'tanvīr'
ki dasht dasht shafaq ke gulāb baaqī haiñ

kuchh is tarah se tirī yaad kī mahak aa.ī
ki jaise dāman-e-sahrā meñ koī phuul khilā

haiñ rañg-ba-rañg ke phuul khile zīnat hai chaman ke shabāb un kā
kholā hai nasīm-e-sahar ne abhī kis shaan se band naqāb un kā

chāhtā huuñ ki yahāñ phuul khile hoñ har-sū
ya.anī ye jañg kā maidān nahīñ chāhtā maiñ

mere dil-e-tabāh kā aalam na pūchhiye
ik phuul thā jo khilte hī murjhā ke rah gayā