Tags-Phool

yuuñ hai vahshat-kada-e-dil meñ tirī yaad ai dost
jaise sahrā meñ koī phuul khilā hotā hai

kāñTe ko phuul sañg ko gauhar kahā gayā
is shahr meñ gadā ko sikandar kahā gayā

chalo ek ek kar ke bāñTte haiñ peḌoñ ko
phal vaale peḌ aur phuul vaale peḌ

itnā nārāz ho kyuuñ us ne jo patthar pheñkā
us ke hāthoñ se kabhī phuul bhī aayā hogā

na ek buuñd ināyat na phuul bhar ḳhushbū
ye kis dayār ke bādal qafas pe chhā.e haiñ

añgāre baraste haiñ agar kuchh to hai varna
is muñh se sadā phuul mohabbat ke jhaḌe haiñ

mahfil se uThāne ke sazā-vār hamīñ the
sab phuul tire baaġh the ik ḳhaar hamīñ the

ye soch ke uThnā har din tum is dil kā phuul khilegā zarūr
is aas pe sonā ab kī shab koī ḳhvāb nirālā aa.egā

phuul kitābeñ le jā tanhā rahne de
merā kamra, merā kamra rahne de

jo phuul aayā sabz qadam ho ke rah gayā
kab fasl-e-gul hai fasl-e-tarab apne shahr meñ

sharm ke kuchh phuul le kar kuchh nadāmat ke guhar
tere parvarda tirī daulat-sarā meñ aa.e haiñ

shāḳh se kaT kar alag hone kā ham ko ġham nahīñ
phuul haiñ ḳhushbū luTā kar ḳhaak ho jā.eñge ham

baaġh vīrān bahāroñ meñ rahe aur 'shādāb'
phuul jañgal meñ khile fasl-e-ḳhizāñ hote hue

tujh phuul ke hisār meñ ik lutf hai ajab
chhū kar jise havā-e-tarab-e-motabar ga.ī

phuul ne murjhāte murjhāte kahā āhista se
ho rahī hai mujh se ḳhushbū bhī judā āhista se

chāhat ke phir phuul khileñge aap kī ye ḳhush-fahmī hai
kapḌe mere sāmne mausam ne badle ḳhāmoshī se

mauj-e-nashīm-e-sub.h na josh-e-numū se thā
jo phuul sruḳh-rū thā ḳhizāñ ke lahū se thā

saath hoñge ham to sach meñ phuul khilte jā.eñge
aap kā hī bas nahīñ tanhā safar merā bhī hai

bajā.e rañg rag-e-ġhunchā se lahū Tapke
khile jo phuul to har barg-e-gul sharar ho jaa.e

ye kaun aayā hai gulshan meñ tāzgī le kar
chaman meñ phuul bahāroñ se baat karte haiñ