Tags-Phool

vo ye kah kar daaġh dete haiñ mujhe
phuul se pahle samar aate nahīñ

ye phuul rañg sitāre fazā kī ra.anā.ī
uThā ke bhuul gayā apne ruḳh se parda kaun

dekhiye khiltā hai ab kaun se ehsās kā phuul
dekhiye ruuh meñ ab kaun sī ḳhushbū jaage

bahār aa.ī hai lekin khile haiñ aag ke phuul
har ik daraḳht meñ rakh kar gayā hai sho.ala kaun

is dasht-e-suḳhan meñ koī kyā phuul khilā.e
chamkī jo zarā dhuup to jalne lage saa.e

phuul kyā Dāloge turbat par mirī
ḳhaak bhī tum se na Daalī jā.egī

gosha-e-dil meñ koī phuul khilā.e rakkho
ek ummīd pe āñgan ko sajā.e rakkho

roz dariyā meñ jo ik phuul bahā detā huuñ
ye kisī dukh kā ishāra hai aqīdat kā nahīñ

biite hue lamhāt ko pahchān meñ rakhnā
murjhā.e hue phuul bhī gul-dān meñ rakhnā

sañg meñ phuul khilāne vaalo
fan yahāñ bā.is-e-tauqīr nahīñ

koī mahbūb sitamgar bhī to ho saktā hai
phuul ke haath meñ ḳhanjar bhī to ho saktā hai

tā mujhe chhoḌ sako patjhaḌ meñ
is liye phuul kahā thā mujh ko

koī phuul sā haath kāñdhe pe thā
mire paañv sho.aloñ pe jalte rahe

aise pāmāl ki pahchān meñ aate hī nahīñ
phuul se chehre mire dhyān meñ aate hī nahīñ

gulzār-e-jahāñ kī nairañgī āzār jinheñ pahuñchātī hai
kāñToñ ko haTā kar dāman meñ vo phuul chaman ke chunte haiñ

lage hue haiñ yahāñ phuul phuul se kāñTe
mire chaman ke nazāro mujhe fareb na do

ham husn-e-itiqād se samjhe chaḌhā.e phuul
gul kar diyā jo us ne charāġh-e-mazār ko

raat ghar meñ thī sar-phirī āñdhī
sirf kāñTe haiñ phūl-dānoñ meñ

log hameñ mahsūs kareñge phuul aur taare
aur ham sochtī ''dil-āñkhoñ'' meñ baT jā.eñge

is baaġh meñ kis kā phuul chunte dekhā
sar ḳhaak pe bāġhbāñ ko dhunte dekhā