Tags-Phool

us ko zaḳhm mile duniyā meñ jis ne māñge taaza phuul
jis ne chāhī chhāñv kī chhatrī us ke sar par chhā.ī dhuup

hañste phuul kā chehra dekhūñ aur bhar aa.e aañkh
apne saath ye qissa kyā hai ab ma.alūm huā

havā bahār kī aa.egī aur maiñ chūmūñgā
vo saare phuul ki jin meñ tirī shabāhat hai

ab tū hī hamāre chāra-gar kar un kā mudāvā duniyā meñ
jo din bhar to phuul chuneñ aur raat ko kāñTe bo dete haiñ

bāġhbānī abhī lazzat-kash-e-gul-chīnī hai
dekh kar dast-e-havas phuul laraz jaate haiñ

phuul gulshan meñ jigar-chāk nazar aate haiñ
sarv ke saa.e pe zindāñ kā gumāñ guzrā hai

paḌosī ho to phal yā phuul laate
tumhāre haath meñ hathiyār kyuuñ hai

phal phuul nahīñ laate ye bāġh-e-mohabbat meñ
har naḳhl-e-tamannā ko be-barg-o-samar dekhā

phuul sā nāzuk dil bhī apnā
gardish-e-sub.h-o-shām bhī apnī

jab kahīñ phuul mahakte dekhe
phir tirā band-e-qabā yaad aayā

talḳhiyāñ niim ke pattoñ kī milī haiñ har sū
ye mirā shahr kisī phuul kī ḳhushbū bhī nahīñ

ḳhuddarī-e-jamāl gavārā na kar sakī
us ne masal ke pheñk diyā phuul lawn par

āḳhirash haath jalā hī liye apne ham ne
jaane kyuuñ phuul nazar aate the añgāroñ meñ

phuul bikhrātī har ik mauj-e-havā aatī hai
aap aate haiñ ki gulshan meñ sabā aatī hai

khol dī hai zulf kis ne phuul se ruḳhsār par
chhā ga.ī kaalī ghaTā sī aan kar gulzār par

afsāna-e-hayāt banī phuul ban ga.ī
jab muskurā.ī koī kalī iztirāb meñ

vo mile haiñ magar malūl haiñ ham
jo ḳhizāñ meñ khile vo phuul haiñ ham

pyaar kī chāñdnī meñ khilte haiñ
dasht-e-insāniyat ke phuul haiñ ham

phuul kī ḳhushbū hañstī aa.ī
mere basere ko mahkāne

raat jab phuul ke ruḳhsār pe dhīre se jhukī
chāñd ne jhuk ke kahā aur zarā āhista