Tags-Phool

'vasīm' kis ne kahā thā ki yuuñ ġhazal kah kar
ye phuul jaisī zamīñ āñsuoñ se tar kar de

sadā-e-lams-e-lab de bhī ki maiñ ġhuncha suḳhan kā
bahut din ho ga.e ab phuul honā chāhtā huuñ

kabhī kabhī to phuul kī ḳhushbū bhī kar detī hai zukām
kabhī kabhī to sharāb bhī hotī hai jīvan kā vardān

un meñ shāmil muskurāte phuul bhī taare bhī haiñ
jin darīchoñ se shu.ūr-e-husn-e-yār aatā gayā

vo duniyā zindagī ke phuul barsātī huī duniyā
mulā.em nuzhatoñ kī raqs farmātī huī duniyā

gharoñ ke tāqoñ meñ gul-daste yuuñ nahīñ sajte
jahāñ haiñ phuul vahīñ ās-pās ḳhaar bhī rakh

ajiib shaḳhs thā bārish kā rañg dekh ke bhī
khule darīche pe ik pūl-dān chhoḌ gayā

apne ba.ad haqīqat yā afsāna chhoḌā thā
phuul khile the maiñ ne jab vīrāna chhoḌā thā

vaqt kī tez havāoñ ne ajab moḌ liyā
phuul se haath jo the un meñ bhī patthar nikle

faiz-e-junūñ se jaag uThā hai aaj muqaddar sahrā kā
phuul khilāte haiñ is meñ bhī dekhiye kuchh dīvāne log

dāġh-e-jigar ke phuul meñ phuul sadā-bahār ke
rahtā hai rañg ek saañ in kā ḳhizāñ bahār meñ

dāman-e-shab meñ haiñ kitne phuul kyā us ko ḳhabar
so gayā koh-e-mashaqqat ko jo din-bhar kaaT kar

ḳhvāhish ke kārobār kī rasmeñ badal ga.iiñ
milte haiñ phuul baḌh ke ḳhud apne ma.aal se

lafz yuuñ phuul ban ke jhaḌte haiñ
goyā har sū barāt hotī hai

ugāyā jis ne hai banjar zamīñ meñ tujh ko 'nasīm'
hai kyā ba.iid ki vo phuul bhī khilā degā

sho.ala-e-gul gulāb sho.ala kyā
aag aur phuul kā ye rishta kyā

vafā kī nagrī luTī to us ke asāsoñ kā bhī hisāb Thahrā
kisī ke hisse meñ zaḳhm aa.e kisī ke hisse meñ phuul aa.e

daraḳht-e-jāñ par azāb-rut thī na barg jaage na phuul aa.e
bahār-vādī se jitne panchhī idhar ko aa.e malūl aa.e

phuul ko ham ne jab bhī chhuā hai
haath meñ ik chiñgārī aa.ī