Tags-Phool

ajiib log haiñ kāñToñ pe phuul rakhte haiñ
ye jānte hue in meñ muqaddarī kam hai

mere liye to jaise vo kāġhaz kā phuul thā
us ḳhushnumā gulāb meñ ab kyā hai kuchh nahīñ

kyā us ko ḳhabar hai kahāñ le jā.egī ḳhushbū
vo phuul ki utrā hai abhī shāḳh-e-chaman se

bāġh-e-ālam meñ rahe shādī-o-mātam kī tarah
phuul kī tarah hañse ro diye shabnam kī tarah

sabhī sehn-e-chaman meñ phuul chunñe ko nahīñ aate
kuchh apne dāmanoñ meñ ḳhaar uljhāne bhī aate haiñ

ka.ī miil ret ko kaaT kar koī mauj phuul khilā ga.ī
koī peḌ pyaas se mar rahā hai nadī ke paas khaḌā huā

koī phuul dhuup kī pattiyoñ meñ hare ribbon se bañdhā huā
vo ġhazal kā lahja nayā nayā na kahā huā na sunā huā

khetoñ ke beach phuul ke bistar ke ās-pās
mausam to aa ke baiTh mire ghar ke ās-pās

apnī ḳhushbū ko fazāoñ meñ bikhar jaane do
phuul ban jaao mahakte hue bāloñ meñ raho

har taraf thā hisār kāñToñ kā
phuul fikr-e-numū meñ kho.e rahe

agarche phuul ye apne liye ḳharīde haiñ
koī jo pūchhe to kah dūñgā us ne bheje haiñ

kaf-e-bāġhbāñ pe bahār-e-gul kā hai qarz pahle se besh-tar
ki har ek phuul ke pairahan meñ numūd mere lahū kī hai

phuul lagtā nahīñ hargiz tire hoñToñ kī misāl
sarv tujh qad ke barābar nahīñ lagtā mujh ko

añg añg se rañg rañg ke phuul baraste dekhe kaun
rañg rañg se shole barse kaise barse soche kaun

phuul kī rañgat maiñ ne dekhī dard kī rañgat dekhe kaun
pyaar kā giit sunā hai sab ne dhun thī kaisī soche kaun

bas ek lafz mirā phuul sā khilā degā
bahār ban ke tire ghar ko bhī sajā degā

nasīm aa.ī mere qafas meñ abas
gulistāñ se do phuul laa.ī nahīñ

mehr o mah gul phuul sab the par hameñ
chehra.ī chehra hī vo bhātā rahā

maiñ bhī sharīk-e-marg huuñ mar mere sāmne
merī sadā ke phuul bikhar mere sāmne

aaj dīvāne ko be-vaj.h satāyā jaa.e
phuul taaza koī bāloñ meñ lagāyā jaa.e