Tags-Phool

burā ḳhizāñ kā ho dekhe jo sūkhe sūkhe hoñT
ġharīb phuul pe mujh ko ġhazab kā pyaar aayā

sehr kaisā ye na.ī rut ne kiyā dhartī par
muddatoñ baad koī phuul khilā dhartī par

shāyad use bhī le ga.e achchhe dinoñ ke qāfile
is baaġh meñ ik phuul thā terī tarah hañstā huā

shabnam ke aañsū phuul par ye to vahī qissa huā
āñkheñ mirī bhīgī huī chehra tirā utrā huā

havā meñ ḳhushbueñ merī pahchān ban ga.ī thiiñ
maiñ apnī miTTī se phuul ban kar ubhar rahā thā

ḳhushbū kahīñ to phuul havā le uḌī kahīñ
yuuñ muntashir kisī kā qabīla nahīñ huā

badan meñ phuul bhī chubhne lage haiñ
bahut nāzuk haiñ ehsāsāt ab ke

rauñdeñ to ye kaliyāñ nīsh-e-balā chūmeñ to ye sho.ale phuul
ye ġham ye kisī kī den bhī hai in.aam ajab in.aam

baaġh meñ jā kar dekh liyā
koī nahīñ thā tujh sā phuul

tere mehmāñ ke svāgat kā koī phuul the ham
jo bhī niklā hameñ pairoñ se kuchal kar niklā

mausam-e-gul meñ agar karnī hoñ kuchh bāteñ 'valī'
phuul kī ḳhushbū kī aur naġhmāt kī bāteñ karo

likhūñ vo naam to kāġhaz pe phuul khilte haiñ
karūñ ḳhayāl to paikar kisī kā Dhaltā hai

juuñ chaman ke dekh bulbul ḳhush huā
bolte har phuul par mazmūñ-navā

uu he qaane phuul ke yak baas par
u na samajyā añg bhar laayā chuvā

huā na ḳhatm azāboñ kā silsila ab tak
ḳhizāñ kī zad meñ bhī ik phuul hai harā ab tak

koī kaise miltā hai phuul kaise khiltā hai aañkh kaise jhuktī hai saañs kaise ruktī hai
kaise rah nikaltī hai kaise baat chaltī hai shauq kī zabāñ kyā hai tum na jaan pāoge

bachpan yaad ke rañg-mahal meñ kaise kaise phuul khile
Dhol baje aur aañsū Tapke kahīñ moharram hone lagā

ek phuul kā chaman meñ talabgār maiñ huā
vo phuul khil rahā thā sar-e-shāḳh aarzū

Tapakte haiñ shab-e-ġham dil ke TukḌe dīda-e-tar se
sahar ko kaise kaise phuul chuntā huuñ maiñ bistar se

maiñ aane vaale dinoñ kī zabān jāntā thā
isī liye mirī ġhazloñ meñ phuul khilte rahe