Tags-Phool

apnī āñkhoñ ke liye dard ke aañsū DhūñDūñ
apne qadmoñ ke liye phuul se chhāle māñgūñ

vo ko.ele se mirā naam likh chukā to use
sunā hai dekhne vāloñ ne phuul maare haiñ

maiñ kināroñ ko rulāne lagā huuñ
phuul dariyā meñ bahāne lagā huuñ

chāndnī meñ ai dil ik ik phuul se
apne gul-ruḳhsār kī bāteñ kareñ

jo ḳhvāb parā.e des meñ tum nahīñ dekh sake
vo phuul

ḳhushbū kī tarah phuul ke pinjre meñ nahīñ band
āzād fazāoñ kā muqaddar bhī nahīñ ham

tū jo phūloñ kī tarah phuul kar itrātā hai
dekhnā yaar tire jaam meñ shabnam to nahīñ

husn-e-insāñ dafn ho jaane se miTtā hai kahāñ
phuul ban kar ḳhaak ke parde se bāhar aa gayā

dil hai ajiib gul chaman-e-rozgār meñ
rañgat to phuul kī hai magar bū vafā kī hai

ghaTā dekh kar ḳhush huiiñ laḌkiyāñ
chhatoñ par khile phuul barsāt ke

tumhāre ḳhayāloñ kī añgnā.iyoñ meñ mirī yaad ke phuul mahke to hoñge
kabhī apnī āñkhoñ ke kājal se tum ne mirā naam likh kar miTāyā to hogā

kahāñ ḳhāk-e-madīna aur kahāñ ḳhākistar-e-dil
kahāñ kā phuul thā lekin kahāñ par aa khilā hai

na vo baaġh haiñ na ghaTā.eñ haiñ na vo phuul haiñ na fazā.eñ haiñ
na vo nik.hateñ na havā.eñ haiñ na vo be-ḳhudī kā samāñ rahā

na.ī rutoñ meñ bhī 'sābir' udāsiyāñ na ga.iiñ
ḳhamīda-sar hai har ik shāḳh phuul phal ke bhī

dayār-e-ishq ke paudoñ meñ ab bhī phuul aate haiñ
ki ham ne bhiik meñ 'sājid' kabhī aḳhgar nahīñ paa.e

shāḳh-e-gul mauj-e-havā raqsāñ haiñ
phuul bikhre to bikhar jaa.e jī

aag hī aag ho siine meñ to kyā phuul jhaḌeñ
shola hotī hai zabāñ lafz sharar bantā hai

va.ada-e-rañgīñ se hogā haa.e kyā ḳhaak ehtimām
aarzū ke phuul chuTkī se masal jaane ke ba.ad

har shāḳh sulagtī hai har phuul dahaktā hai
girtī hai kabhī shabnam kuchh aur tarah se bhī

mire āñgan ke sabhī phuul bahut mahñge haiñ
apne gulshan ko maiñ sahrā nahīñ karne vaalī