Tags-Qismat

kuñvāre log to har mulk meñ āzād phirte haiñ
magar shādī-shuda qismat ke maare ek jaise haiñ

khel hai sarkash havāoñ ke liye merā vajūd
kam-tanābī jis kī qismat hai vo ik ḳhema huuñ maiñ

chhoḌūñgā na maiñ tujh ko tire ḳhat ke bhī aa.e
tū tab bhī na ho yaar to ye bhī mirī qismat

rozī huā hai dāna-e-zanjīr-o-āb-e-teġh
qismat kā āshiqoñ kī ye hai āb-o-dāna thā

tum is se kyā bachoge 'shauq'-sāhab
ki qismat meñ yahī gardish likhī hai

muzhda phir ḳhāk-e-ḳhizāñ-rañg kī qismat jaagī
aa gayā jhuum ke abr-e-guhar-afshāñ dekho

nazar un kī paḌī hai jab se mujh par
mirī qismat meñ koī ġham nahīñ hai

merī qismat meñ ġham gar itnā thā
dil bhī yā-rab ka.ī diye hote

maiñ ne sunā hai sahrā par bhī chhīñTā to paḌ jaatā hai
dekhnā ye hai shūmī-e-qismat kab din mere phirte haiñ

qismat meñ to hijr hai 'ġhazanfar'
ab vo hai to aap meñ nahīñ ham

badal sakte ho tum bigḌī huī qismat zamāne kī
tumhārī ik nigāh-e-nāz se kyā ho nahīñ saktā

daf.atan kis ne jagā dī mirī soī qismat
merā muñh chuum liyā ḳhvāb meñ 'afsar' kis ne

safar bhī ho mayassar vo bhī din qismat dikhā.e
maiñ barsoñ se irāda hī irāda kar rahā huuñ

lagtā hai tabāhī mirī qismat se lagī hai
ye kaun sī āñdhī mire andar se uThī hai

aur to apnī qismat meñ kyā likkhā hai
tere naam kī maalā japnā likkhā hai

agar nahīñ maiñ to phir us kā naam batā
jis kī qismat meñ mai-ḳhāna likkhā hai

vo aa.e yā vaade par na aa.e balā se qismat jo kuchh dikhā de
magar hameñ dekhnā to ye hai ki aaj hotī hai shaam kab tak

mirī qismat likhī jaatī thī jis din maiñ agar hotā
uḌā hī letā dast-e-kātib-e-taqdīr se kāġhaz

thī sazā apnī jo shādī-marg qismat ne kiyā
hijr meñ kis ne kahā thā vasl kā ġham kījiye

vo tere faqīroñ ko āñkhoñ se zarā dekhe
jis ne nahīñ dekhā hai qismat kā badal jaanā