Tags-Qismat

jalva dekhoge kahāñ dil ke alāva apnā
mire TuuTe hue ā.īne kī qismat samjho

kabhī tasavvur meñ aa.e bhī to ghanerī zulfoñ ko ruḳh pe Daale
hamārī qismat meñ shām-e-ġham thī numūd-e-nūr-e-sahar se pahle

jis ko tum roz dikh hī jaate ho
us kī qismat hai aa.ina honā

vo bhī kahte hue kuchh duur tak aa.e pīchhe
ham jo us bazm se nikle bhī to tauqīr ke saath

baat qismat kī to kuchh ai dil-e-nākām nahīñ
apnī taqsīr hai ye gardish-e-ayyām nahīñ

jins-e-girāñ thī ḳhūbī-e-qismat nahīñ milī
bikne ko ham bhī aa.e the qīmat nahīñ milī

jalte haiñ ġhair apnā to matlab nikal gayā
qismat se baat ban bhī ga.ī daav chal gayā

siyah paḌ jā.egī zarroñ kī rañgat ek hī pal meñ
agar qismat se mil jaa.e mirī taqdīr miTTī ko

kavākib-hā-e-qismat āsmāñ par
na huuñ... kyuuñ nukta-chīñ maiñ nukta-dāñ huuñ

hai bahut muhāl is kā jo 'ġhubār' mā-badal ho
mirī tīrgī-e-qismat mirī shaam ban ke aa.ī

zulfoñ kī siyāhī meñ kuchh ik daam the apne
qismat ki huī raat vo tanḳhvāh kisū kī

baaġh mile us qismat ko
ham ne to vīrāne dekhe

azal se qismat-e-ādam mohabbat se hai vābasta
jahāñ meñ kis liye phir aah rusvā ho ga.e ham tum

mirī qismat meñ sāhil hai yā tūfāñ
hathelī par samundar hai nahīñ hai

ajnabiyyat kā vo ehsās thā merī qismat
vo jo apnā nahīñ lagtā thā mirā apnā thā

vāqif kab thā pyaar se pahle lekin 'zākir' pyaar ke ba.ad
qismat rekhā husn-o-adā aur nāz-o-jafā sab jaan liyā

aur bande haiñ jin ko dāva-e-ḳhudā.ī hai
thī hamārī qismat meñ bandagī ḳhudā ho kar

ab kī baar ai buzdil qismat khul kar mere sāmne aa
kyuuñ ik dhachkā roz lagā kar baaqī kal par Tāltī hai

jahāñ se vāpsī kā rāsta qismat se miltā hai
vahāñ tak qāfile ko qāfila-sālār le aayā

phir ik din un kī qismat meñ likhī jaatī hai rusvā.ī
zamāne meñ samajhte haiñ jo kārobār aurat ko