Tags-Qismat

ham ga.e vaañ to yaañ vo aayā vaah
ḳhuub qismat ne her-pher rakhā

ai ḳhāliq qismat kā taarā chamkā de
roz samay ke juute polish kartā huuñ

haif us chaar girah kapḌe kī qismat 'ġhālib'
jis kī qismat meñ ho āshiq kā garebāñ honā

us ke dar par mujhe ai gardish-e-qismat le chal
sab nikammoñ ko jahāñ kaam baTā karte haiñ

allāh-re qismat ki shahāb un kī galī meñ
saa.e kī tarah shām-o-sahar aane lagā huuñ

merī qismat hī nahīñ merī tabāhī kā sabab
is meñ us shoḳh kī shāmil nigah-e-nāz bhī hai

qismat meñ ḳhushī jitnī thī huī aur ġham bhī hai jitnā honā hai
ghar phūñk tamāshā dekh chuke ab jañgal jañgal ronā hai

vo nigāheñ kyuuñ huī jaatī haiñ yā-rab dil ke paar
jo mirī kotāhī-e-qismat se mizhgāñ ho ga.iiñ

vo haath un ke chūmtī hai maiñ huuñ pā.emāl
ye haiñ mire nasīb vo qismat hinā kī hai

qismat pe kabhī jhunjhlātī hai jiine se kabhī tañg aatī hai
zardār paḌosan ḳhush ho kar sab dekhtī hai aur khātī hai

vo vāsta jis ko fāqoñ roze roze be-bechāra kyā rakkhe
din dekh chukā shab dekh chukā qismat kā sahārā kyā rakhe

ab ye qismat hī na jaage to kare kyā koī
roz-o-shab ik nayā tūfān uThāyā to gayā

qismat hai aage vasl mayassar ho yā na ho
aa.e to minnatoñ se vo baare palañg par

sāñjh-savere phirte haiñ ham jaane kis vīrāne meñ
sāvan jaisī dhuup likhī hai qismat ke har ḳhāne meñ

maiñ us manzil meñ huuñ ab gām-farsā ai zahe-qismat
nigāh-e-rāhzan bhī rahnumā ma.alūm hotī hai

jab kabhī mil ga.e vo qismat se
phir zamāne kī baat hone galī

chāñdnī hai raat hai ḳhalvat hai sehn-e-bāġh hai
jaam bhar saaqī ki ye qismat se haath aa.ī hai raat

hai turfa qismat apnī ki jis jā ho ek dost
vaañ dekhiye to jaan kā ḳhvāhāñ hai dūsrā

un kā dīdār merī qismat meñ
ishq to ḳhush hai itnī ujrat meñ