Tags-Raaz

mire rū-ba-rū mujhe maiñ dikhā.ī nahīñ diyā
mire ā.īne mire rāz-dāñ mujhe kyā huā

sitāre kā raaz rakh liyā mehmān maiñ ne
ik ujle ḳhvāb aur aañkh ke darmiyān maiñ ne

an-kahī baat bhalā likkhūñ to likkhūñ kaise
saade kāġhaz pe koī raaz raqam hai us kā

vo jo hamrāz rahā hāzir-o-mustaqbil kā
us ke ḳhvāboñ kī ḳhushī ruuh kā ġham le ke chalo

terī nazar meñ rah kar ik raaz ban gayā thā
gir kar tirī nazar se afsāna ho gayā maiñ

tujh se nazar milā kar dīvāna ho gayā maiñ
kuchh raaz ban gayā kuchh afsāna ho gayā maiñ

pās-e-ādāb-e-mohabbat ki ba-īñ raaz o niyāz
muddatoñ bād-e-sabā se na koī baat huī

mai-kade kā raaz parde hī meñ rahnā ḳhuub thā
dekh saaqī shīsha kuchh kahtā hai thak kar jaam se

ġham ke bādal dil-e-nāshād pe aise chhā.e
sāya-e-gul meñ bhī hamrāz na hañsne paa.e

haa.e vo rāz-e-ġham ki jo ab tak
tere dil meñ mirī nigāh meñ hai

jo dil se aa.e zabāñ par vo raaz raaz kahāñ
jo rāzdāñ the unheñ bhī batā ke dekh liyā

ḳhudī kā rāzdāñ ho kar ḳhudī kī dāstāñ ho jā
jahāñ se kyā ġharaz tujh ko tū aap apnā jahāñ ho jā

zamāne par bharosā kar na rāz-e-ishq kā ai dil
jahāñ tak ho sake tū aap apnā rāz-dāñ ho jā

na-jāne rāz-e-mohabbat kā hashr kyā hogā
banā liye haiñ ka.ī apne rāz-dāñ ham ne

aql-o-shu.ūr bhī haiñ kyā uqda-e-rāz-e-dahr haiñ
rah ga.e aur ulajh ke ham sa.ī-e-kashūd-e-rāz meñ

jab tum se mohabbat kī ham ne tab jā ke kahīñ ye raaz khulā
marne kā salīqa aate hī jiine kā shu.ūr aa jaatā hai

bas ek lamha-e-rāz-o-niyāz kī ḳhātir
bashar ko muddatoñ chhup-chhup ke ronā paḌtā hai

ishq meñ rāz-e-baqā kyā hai ḳhabar thī ham ko
ham ne kuchh soch samajh kar hī fanā māñgī thī

na vo mire dil se bā-ḳhabar the na un ko ehsās-e-ārzū thā
magar nizām-e-vafā thā qaa.em kushūd-e-rāz-e-nihāñ se pahle

rāz-e-sar-basta kī tarah 'sāhir'
abhī ḳhud par khulā nahīñ huuñ maiñ