Tags-Raaz

parda-e-chashm meñ har dam to chhupā.e aañsū
be-qarārī ne mujhe raaz chhupāne na diyā

sameTe apne sarāboñ meñ bārishoñ kā jamāl
kahāñ kā qasd hai ye raaz ḳhush-nazar kholeñ

kuchh un ke rahm pe thī yuuñ hī zindagī mauqūf
ki un ko rāz-e-mohabbat bhī ho gayā ma.alūm

huā na rāz-e-razā faash vo to ye kahiye
mire nasīb meñ thī varna sa.ī-e-nā-ma.alūm

mirī ḳhāmushī mirī be-hisī yahī merā rāz-e-fasurdagī
kabhī so gayā huuñ to jaag uThī hai ye dil kī choT dabī dabī

samajh sakegā vahāñ kaun rāz-e-mai-ḳhāna
'nasīm' tishna-labī ko jahāñ ḳhumār kaheñ

is se bichhḌuñgī to zinda nahīñ rah pā.ūñgī
merī mūnis mirī hamrāz ye tanhā.ī hai

kahā dost ne us se ba.ad-az-namāz
qasā.ī kahāñ hai batā do ye raaz

mujh ko tanhā dekhne vaale na samjheñ rāz-e-ishq
merī tanhā.ī ke lamhe yaar ke āġhosh haiñ

har baat yahāñ raaz banī jaatī hai
majbūrī bhī dam-sāz banī jaatī hai

duniyā kabhī ho sakī na hamrāz marī
kyā jaane thī kis fazā meñ parvāz mirī

maiñ talab ke dasht meñ phir chukā to ye raaz mujh pe ayaañ huā
mirī tishnagī ke ye pher haiñ ki jo aab se haiñ sarāb tak

rukā to raaz khulā kab se apne ghar meñ thā
ki merā ghar to mirī hālat-e-safar meñ thā

mahfil-e-rāz meñ ham sah ga.e har vahm kī choT
āḳhir ik ishq kā me.aar banā kar uTThe

junūñ kā raaz mohabbat kā bhed pā na sakī
hamārā saath ye duniyā magar nibhā na sakī

kahūñ kyā rāz-e-dil kyuuñ kar ho bāvar
ki tum sā hī tumhārā rāz-dāñ ho

ḳhat-e-sāġhar meñ rāz-e-haq-o-bātil dekhne vaale
abhī kuchh log haiñ saaqī kī mahfil dekhne vaale

us ne tirī nigāh se kyā raaz pā liye
ḳhud apne dil meñ us ne Thikāne banā liye

marqad sā banā hai ḳhushbū kā muñh band kalī ke siine meñ
ai shām-e-gulistāñ tū hī batā ye bhī to kisī kā raaz nahīñ

kyā ruuh kī gahrā.ī meñ tum jhāñk rahe ho
ab raaz mohabbat ke chhupā.e nahīñ jaate