Tags-Raaz

nahīñ sirf zāhid hī jalvoñ kā mahram
tire husn ke rāzdāñ aur bhī haiñ

kiye jā.iye sa.ī-e-tasḳhīr-e-fitrat
abhī rāz-hā-e-nihāñ aur bhī haiñ

maiñ is duniyā meñ ai 'sīmāb' ik rāz-e-haqīqat thā
samajhne kī tarah ahl-e-jahāñ mujh ko kahāñ samjhe

baḌī mushkil se un kā rāz-e-ulfat ho sakā pinhāñ
baḌī muddat meñ jā kar ham mizāj-e-rāz-dāñ samjhe

apnā harf-e-ārzū bhī kyā qayāmat hai 'nazīr'
dāstāñ-dar-dāstāñ hai harf harf us raaz kā

khul gayā shāyad bharam ai dil junūñ ke raaz kā
badlā badlā sā nazar aatā hai ruḳh dam-sāz kā

kaho to rāz-e-hayāt kah duuñ haqīqat-e-kā.enāt kah duuñ
vo baat kah duuñ ki pattharoñ ke jigar ko bhī aab aab kar de

ḳhudā kare yahīñ ruk jaa.e gardish-e-daurāñ
hai rāzdār-e-mohabbat sukūt-e-nīm-shabī

raaz siine meñ dabā hai jo sar-e-bazm kahūñ
sirf ik baar mujhe us kī razā dī jaa.e

hai sāhab-e-īmāñ kī kamī ahl-e-jahāñ meñ
ik raaz bhī varna tirā mastūr nahīñ hai

poshīda haiñ gunāhoñ meñ barbādiyoñ ke raaz
nāzil ho dil pe harf-e-nadāmat ḳhudā kare

terī nigāh-e-mast se mujh pe ye raaz khul gayā
aur bhī gardisheñ haiñ kuchh gardish-e-jām ke sivā

ashk qaabū meñ nahīñ raaz chhupā.ūñ kyūñkar
dushmanī mujh se mire dīda-e-tar rakhte haiñ

ab to sad-chāk haiñ gul ke parde
raaz khole haiñ sabā ne kitne

ta.ajjub un ko hai kyuuñ merī ḳhud-kalāmī par
har aadmī kā koī rāz-dāñ zarūrī hai

vo harf-e-rāz ki mujh ko sikhā gayā hai junūñ
ḳhudā mujhe nafas-e-jabra.īl de to kahūñ

na rāz-e-ibtidā samjho na rāz-e-intihā samjho
nazar vāloñ tumheñ karnā hai ab duniyā meñ kyā samjho

raaz pinhāñ the sab ḳhizāoñ ke
ḳhushk pattoñ ne baat uchhālī hai

anjuman-dar-anjuman tafrīq-e-ḳhās-o-ām hai
hai koī jo raaz kah de barmalā merī tarah

dil kahāñ hai jigar kahāñ apnā
ab nahīñ koī rāzdāñ apnā