Tags-Raaz

raaz kī baat hai duā na karo
yaad rakhnā hameñ duāoñ meñ

rāz-e-dil laate haiñ zabāñ tak ham
dukh bhareñ ai ḳhudā kahāñ tak ham

tire sukūt se vo raaz bhī hue ifshā
ki jin ko kaan taraste the rāz-dānoñ ke

rāz-e-taqdīr pe kyā raushnī Dālegā koī
ḳhud savālī hai savālāt samajhne vaalā

ḳhāmoshī kā raaz kholnā bhī sīkho
āñkhoñ kī zabāñ se bolnā bhī sīkho

qulqul-e-shīsha-e-mai se tire mai-kash saaqī
sun rahe haiñ ḳhabar-e-rāz-e-nihān-e-vā.iz

dil jo āgāh-e-rāz ho jaa.e
har haqīqat majāz ho jaa.e

tirī samā.at nigār-e-fitrat ke lahn kī rāz-dāñ nahīñ hai
vagarna zarra hai kaun aisā ki jis ke muñh meñ zabāñ nahīñ hai

vo apne husn kā har raaz kholne ke liye
qabā banāte haiñ band-e-qabā banāte haiñ

'alīm' mat kah ye rāz-e-maḳhfī piyā kī ulfat meñ rah sadā tū
agar sune is suḳhan ko ġhāfil gaḌhegā us par kaThin muammā

jab tum se mohabbat kī ham ne tab jā ke kahīñ ye raaz khulā
marne kā salīqa aate hī jiine kā shu.ūr aa jaatā hai

un kī nazar kī kyā ḳhatā dil se huā qusūr-e-shauq
apne hī rāz-dār ne luuT liyā luTā diyā

is raaz ko kyā jāneñ sāhil ke tamāshā.ī
ham Duub ke samjhe haiñ dariyā tirī gahrā.ī

pesh-e-raqīb pursish-e-dil tum ne ḳhuub kī
dushman thā parda-dār na thā rāz-dāñ na thā

rāz-e-ulfat kahāñ chhupā.eñ ham
dil se bhī dushmanī nahīñ hotī

mahrūm rah na jaa.e koī tishna-kām 'rāz'
arzāñ sharāb-e-rāz kiye jā rahā huuñ maiñ

duniyā ko de rahā huuñ sabaq husn-o-ishq kā
ifshā har ek raaz kiye jā rahā huuñ maiñ

us ne phir aur kyā kahā hogā
rāz-e-hastī batā chukā hogā

ashk Tapke to koī raaz kī tahrīr milī
aur kyā kyā nahīñ ma.alūm likhā hai mujh meñ

dekho pastī se to har ek bulandī hai raaz
jāda-e-koh faqat zer-e-qadam khultā hai