Tags-Raaz

jo un ko rakhegā duniyā meñ surḳh-rū kar ke
maiñ apne bachchoñ ko vo raaz detā rahtā huuñ

begānagī ne ye raaz kholā
tū merā azal se āshnā hai

zulf-e-pareshāñ raaz kī juuyā bād-e-sabā yaksar ġhammāz
baat tirī ḳhalvat tak pahuñchī ham vahshī āvāroñ kī

duniyā ke sahī andāz bahut un galiyoñ ke bhī haiñ raaz bahut
jo Thahre vo sar-afrāz hue jo nikle vo Thukrā.e ga.e

raaz tere jo chhupā.ūñ to ye dam ghuTtā hai
baat kah duuñ jo zamāne se to rusvā.ī hai

hoñT par sach chup kī sūrat khil uThā
raaz ifshā jab huā duniyā hai kaun

kushā-e-rāz azā-e-husain kaise ho
tumhāre qalb meñ rāsiḳh mirā zabūr nahīñ

terī adā se ho na sakā jis kā faisla
vo zindagī kā raaz nishānoñ ne le liyā

rāz-e-ulfat marne vaale ne chhupāyā to bahut
dam nikalte vaqt lab par un kā naam aa hī gayā

kuchh sukūñ kuchh zabt kuchh rañg-e-qarār aatā gayā
al-ġharaz iḳhfā-e-rāz-e-qurb-e-yār aatā gayā

tujh pe ye raaz munkashif zāhid-e-ḳhuld-jū kahāñ
hāsil-e-jannat-nazīr ālam-e-rañg-o-bū bhī hai

ye mere ishq kī majbūriyāñ ma.āz-allāh
tumhārā raaz tumhīñ se chhupā rahā huuñ maiñ

ab tirī anjuman-e-nāz koī raaz nahīñ
ab mirā dard bhī lafzoñ meñ bayāñ hone lagā

kis se hotī haiñ raaz kī bāteñ
kis ko vo be-niyāz miltā hai

shor meñ irtikāz miltā hai
tab kahīñ jā ke raaz miltā hai

sair-e-chaman kuuñ jab ki huā lāla-rū savār
rāz-o-niyāz-e-bulbul-o-gul meñ ḳhalal kiyā

ye ḳhat hai jauhar-e-ā.īna-rāz
ise mushk-e-ḳhutan kahnā bajā hai

chhupā.e ham se kyā kyā raaz apne
agar koī hamārā rāz-dāñ ho

vo raaz siine meñ rakh ke bhejā gayā thā mujh ko
vahī jo ik raaz mujh pe ab tak khulā nahīñ hai

sayyād ko ma.alūm na thā raaz ye shāyad
ye ruuh qafas meñ bhī to āzād rahegī