Tags-Raaz

kahīñ āñkhoñ kī namī raaz na ifshā kar de
maiñ ne muñh pher liyā tū jo zarā yaad aayā

har ek pe ye raaz bhī ifshā nahīñ hotā
achchhā jo nazar aatā hai achchhā nahīñ hotā

ye raaz pā na sake sāhibān-e-hosh-o-ḳhirad
junūñ bhī ik nigah-e-parda-dar kī manzil hai

ham garche falak-parvāz bhī haiñ aur tāroñ ke hamrāz bhī haiñ
sayyād pe aayā rahm hameñ ḳhud shauq se zer-e-dām aa.e

dil meñ hai us rashk-e-yūsuf kī ḳharīdārī kā shauq
mere rāz-e-ishq kī ab hai sar-e-bāzār sharh

jab aañkh khulī vahm bhī thā asl sarāsar
jab raaz khulā asl bhī dhokā nazar aayā

dil ke pardoñ meñ chhupāyā hai tire ishq kā raaz
ḳhalvat-e-dil meñ bhī pardā nazar aatā hai mujhe

tajallī raaz hai sahrā-e-hastī
harīm-e-husn kā parda uThā kyā

rāz-e-hayāt kis ko batā.eñ ki har koī
hai zindagī ko maut kā unvāñ kiye hue

mere chup rahne pe bhī baat vahāñ tak pahuñchī
rāz-e-dil tū ne magar dīda-e-tar kholā hai

mukar lo ishq se lekin sar-e-mahshar na kahnā kuchh
vahāñ par kaun jaane koī apnā rāz-dāñ nikle

kah rahe haiñ havā se rāz-e-chaman
koī ġhunchoñ ke bhī to hoñT siye

chhupā kar sab kī nazroñ se sadā parde meñ rakkhā hai
hazāroñ raaz aise haiñ jinheñ siine meñ rakkhā hai

khuleñge shāḳhoñ ke raaz ahl-e-chaman par ab ke
girah girah se ulajhtī shabnam zarā alag hai

ham kitnī piine vaale haiñ tum kitnī pilāne vaale ho
ye raaz hai tasht-az-bām ki saaqī raat guzarne vaalī hai

qaht-e-vafā meñ valvala-e-jāñ fanā huā
kyā bad-gumāñ haiñ aaj kisī rāzdāñ se ham

āḳhir ko sharāb rañg laa.ī
chhuptā nahīñ raaz mai-kashī kā

pūchh lo mujh se āsmān ke raaz
kuchh dinoñ tak udhar rahā huuñ maiñ

bas ek rāz-e-tasalsul bas ik tasalsul-e-rāz
kahāñ pahuñch ke huī ḳhatm bahs-e-zāt-o-sifāt

fazā meñ mahkī huī chāñdnī ki naġhma-e-rāz
ki utreñ sīna-e-shā.ir meñ jis tarah naġhmāt