Tags-Raaz

āftāb us raaz se nā-āshnā shāyad nahīñ
qaid-e-mehvar se kisī din ye rihā ho jā.egā

vo jo be-niyāz sā ho gayā vo jo ek raaz sā ho gayā
jise kuchh ġharaz hī nahīñ rahī use dast-e-harf-e-savāl kyā

sach to ye hai ki nadāmat hī huī
raaz kī baat kisī se kah ke

aaj tak nazroñ meñ hai vo sohbat-e-rāz-o-niyāz
apnā jaanā yaad hai terā bulānā yaad hai

kaash maiñ kah bhī sakūñ kaash koī sun bhī sake
aah vo raaz ki jo rāz-e-nihāñ hai yaaro

nāseh-e-maslahat-navāz tujh ko batā.ūñ kyā ye raaz
hausla-e-nigāh hai ḳhūn-e-jigar ke baad bhī

ulTī kyuuñ paḌtī hai tadbīr ye ham kyā jāneñ
kaun ulaT detā hai is raaz ko tadbīr se pūchh

vāqif-e-rāz nahīñ pīr-e-muġhāñ sā koī
hai dilā pūchhnā jo kuchh tujhe us piir se pūchh

behtar hai bazm-e-yār meñ ḳhāmosh hī raheñ
kahne ko rāz-e-jāñ dar-o-dīvār kam nahīñ

jaan paate kaise ham rāz-e-hayāt
rāz-e-kun niklā nahīñ juzdān se

kisī kī lauh-e-jabīñ par shikan ye kahtī hai
ki be-ḳhudī meñ koī raaz kah gayā huuñ maiñ

ik umr khoī to ye raaz mujh pe faash huā
ḳhayāl-e-mahr-o-vafā naqsh-e-āb jaisā thā

gale lagā.e mujhe merā rāzdāñ ho jaa.e
kisī tarah ye shajar mujh pe mehrbāñ ho jaa.e

be-hunar honā bhī goyā hai hunar
raaz ye tāḳhīr se jaanā gayā

ham rāz-e-dil chhupāte magar apnī zindagī
puurī khulī kitāb agar ho to kyā kareñ

ham apne raaz pe nāzāñ the sharmsār na the
har ek se suḳhan-e-rāz-dār karte rahe

dushman nahīñ vo apne hī the raaz khul gayā
raushan fasād meñ ye makāñ is qadar huā

mahfil meñ vo jab bahr-e-mulāqāt uThe haiñ
hamrāz se karte hue kuchh baat uThe haiñ

ġhammāzi-e-ḳhushbū pe khulā raaz chaman meñ
guzrī hai sabā gesū-e-dildār se lag kar

ik rāz-e-dilrubā ko bayāñ honā hai abhī
harf-o-sadā ko sho.ala-ba-jāñ honā hai abhī