Tags-Raaz

hai soz-e-dil hī rāz-e-zindagānī
hayāt-e-sham.a hai sirf us kī lau meñ

un kī mohtāt-nigāhī ne bharam khol diyā
jin ko manzūr na thā raaz kā ifshā karnā

āshiq bhī nahīñ sādhū bhī nahīñ phir raaz hai kyā ye 'mirzā'-jī
kis aañch se dahkā hai siina kyā aag jalā.e rakhte haiñ

kahīñ kahīñ to zamīñ āsmāñ se ūñchī hai
ye raaz mujh pe khulā sīḌhiyāñ utarte hue

nahīñ koī rāz-e-yagāngī nahīñ koī sāz-e-fasāngī
magar ek sāz-e-fasāna rāz-e-yagāna ho kahīñ yuuñ na ho

raaz khulte ga.e mire sab par
jis qadar us ne ḳhud-numā.ī kī

khule to kaise khule rāz-e-unfuvān-e-shabāb
hayā ne kyā tire band-e-qabā se kuchh na kahā

mirā rāz-e-dil āshkārā nahīñ
vo dariyā huuñ jis kā kinārā nahīñ

merī mahfil thā mirī ḳhalvat-e-jāñ thā kyā thā
vo ajab shaḳhs thā ik rāz-e-nihāñ thā kyā thā

qahqahe ashk o tabassum aur fuġhāñ
zindagī kyā zindagī kā raaz kyā

paikār tham ga.ī to khulā raaz dosto
mīloñ talak the shahar-ḳharāboñ ke silsile

tū idhar hai ki nahīñ itnā batā de mujh ko
saare parde uThe par raaz abhī baaqī hai

aa.ina ban gayā hamrāz 'niyāzī' jab se
apne chehre ko maiñ ḳhud dekh ke Dar jaatā huuñ

husn ke rāz-e-nihāñ sharh-e-bayāñ tak pahuñche
aañkh se dil meñ ga.e dil se zabāñ tak pahuñche

dil hamārā hai ham is ke haiñ azal se rāz-dār
aap ḳhud aa kar sar-e-bāzār rusvā kījiye

kyā kyā diye fareb ġham-e-ishq-e-yār ne
dil ham se bad-gumān hai aur rāz-dāñ se ham

ye raaz chhup nahīñ saktā hai merī bastī kā
sitam kā sail-e-ravāñ har kisī ne dekhā hai

banāyā hai ahinsā ko usūl-e-zindagī ham ne
sukūn-e-zindagī kā raaz 'tālib' ham samajhte haiñ

milte rahe haiñ raaz hameñ ahal-e-zohd ke
naaz apne shaġhl-e-jām pe karte rahe haiñ ham

amīn-e-rāz-e-ġham nahīñ haiñ dar-ḳhor-e-sitam nahīñ
palaT rahe haiñ aap hī pe aap kā kahā huā