Tags-Raaz

zarra zarra hai yahāñ ik katba-e-sirr-alast
aap hī vāqif nahīñ haiñ rasm-e-ḳhatt-e-rāz se

ze ke reshmī rumāloñ ko kis kis kī nazroñ se chhupā.eñ
kaise haiñ vo log jinheñ ye raaz chhupāne aa jaate haiñ

maiñ sabz rutoñ kī rāzdāñ maiñ patjhaḌ kī hamdard
maiñ apnī aap misāl huuñ merā ek judā andāz

dushman se kah rahā huuñ tirī anjuman kā raaz
yā phuul rakh rahā huuñ maiñ sho.ale ke haat par

der tak iḳhtilāt-e-rāz-o-niyāz
yak-ba-yak ijtināb kā aalam

tū ne ye kyā ġhazab kiyā mujh ko bhī faash kar diyā
maiñ hī to ek raaz thā sīna-e-kā.enāt meñ

shoḳhi-e-iz.hār ġhair-az-vahshat-e-majnūñ nahīñ
lailā-e-manī 'asad' mahmil-nashīn-e-rāz hai

huā rone se rāz-e-dostī faash
hamārā girya thā dushman hamārā

kis ko ma.alūm hai jo rāz-e-mashiyyat hai 'obaid'
jaane kis baat pe kis shaḳhs kī baḳhshish hogī

chāhtā hai dil kisī se raaz kī bāteñ kare
phuul aadhī raat kā āñgan meñ hai mahkā huā

ishq kahte haiñ kise ye pochhiye mansūr se
jāñ-sapārī aur hai aur rāz-dānī aur hai

rāz-e-sar-basta 'jamīla' maiñ kahūñ kyā tujh se
ho gayā merā ye dil ārif-e-kāmil kyūñkar

ye lāzmī hai ki 'asrā' bhulā diyā jaa.e
jo raaz dil kī zamīñ meñ dabā diyā ham ne

khul gayā ye raaz un āñkhoñ ke ashk-e-nāz se
kaifiyāt-e-husn ko ġham se judā samjhā thā maiñ

yād-e-yār kā aa jaanā bhī Thiik sahī
raaz magar gahrā hai dil ke machalne kā

samjho ki ek partav-e-manzar nahīñ tamām
hai tīrgī vo raaz jo tāb-e-gohr meñ hai

jo shikast-e-ārzū par muskurā saktā nahīñ
zindagī kī azmatoñ kā raaz pā saktā nahīñ

hāl-e-dil mujh se na pūchho mirī nazreñ dekho
raaz dil ke to nigāhoñ se adā hote haiñ

siine meñ rāz-e-ishq chhupāyā na jā.egā
ye aag vo hai jis ko dabāyā na jā.egā

jaane kitne raaz khuleñ jis din chehroñ kī raakh dhule
lekin sādhū-santoñ ko dukh de kar paap kamā.e kaun