Tags-Raaz

saaf tauhīn hai ye dard-e-mohabbat kī 'hafīz'
husn kā raaz ho aur merī zabāñ tak pahuñche

rāz-e-sar-basta mohabbat ke zabāñ tak pahuñche
baat baḌh kar ye ḳhudā jaane kahāñ tak pahuñche

use zid ki 'vāmiq'-e-shikva-gar kisī raaz se na ho bā-ḳhabar
mujhe naaz hai ki ye dīda-var mirī umr bhar kī talāsh hai

bāteñ hazār yuuñ to harīfoñ kī chhup ga.iiñ
'vāsif' kā raaz thā jo chhupāyā na jā sakā

is niyyat se tañg aa ke ro.e ham log
is niist kā raaz pā ke ro.e ham log

'ravish' rāz-e-mohabbat aaj bhī hai rāz-e-lā-yanhal
ġhalat sābit hue saare javāb āhista āhista

majnūñ ik aisā raaz hai 'zahra'
jis ne samjhā use paḌā patthar

mere hamrāz mire dost mire saath na chal
lamha lamha tujhe āvāz kī Thokar degā

khulte nahīñ haiñ 'josh' dimāġhoñ pe dil ke raaz
bālā-tar az rasā.i-e-naqd-o-nazar haiñ ham

kyā raaz hai ki jis ko batāne se peshtar
apnā bhī e'tibār nahīñ kar rahā huuñ maiñ

shab na jaane aañkh par kyā raaz ifshā kar ga.ī
ḳhvāb chaknāchūr ho kar rah ga.e ta.abīr se

ham to sadiyoñ se yuuñ hī gosh bar-āvāz rahe
jaane vo kaun hai kyā raaz haiñ tere dil meñ

jahāñ jahāñ par qadam rakhoge tumheñ milegī vahīñ udāsī
ye raaz kuchh is tarah samajh lo makāñ mirā hai makīñ udāsī

jab muḳhālif mirā rāz-dāñ ho gayā
rāz-e-sar-basta sab par ayaañ ho gayā

daar par rakkheñ mujheñ mansūr-vār
faash kar duuñ maiñ agar rāz-e-darūñ

jahān-e-rāz huī jā rahī hai aañkh tirī
kuchh is tarah vo diloñ kā lagā rahī hai surāġh

giitā aur qur.āñ kī tafsīreñ liye
maz.haboñ kā raaz hai urdu zabān

ifshā ye rāz-e-ishq huā merī aah se
jis ko chhupā rahe the vo pinhāñ nahīñ rahā

mansūr jo hotā ahl-e-nazar to dāva-e-bātil kyuuñ kartā
us kī to zabāñ khultī hī nahīñ jo raaz kā mahram hotā hai

bhuul ke kabhī na faash kar rāz-o-niyāz-e-āshiqī
vo bhī agar hoñ sāmne aañkh uThā ke bhī na dekh