Tags-Raaz

shauq aur tanaffur meñ raaz us kā pinhāñ hai
hai koī agar dil-gīr hai agar koī dil-shād

jab tum se mohabbat kī ham ne tab jā ke kahīñ ye raaz khulā
marne kā salīqa aate hī jiine kā shu.ūr aa jaatā hai

shukriya magar nāseh tū ye raaz kyā samjhe
jaur-e-barmalā un kā iltifāt-e-pinhāñ hai

kisī se 'kaif' maiñ rāz-e-haqīqat kis tarah pūchhūñ
har ik sūrat har ik nazzāra hairāñ hai jahāñ maiñ huuñ

ye mere ishq kī majbūriyāñ ma.āz-allāh
tumhārā raaz tumhīñ se chhupā rahā huuñ maiñ

aah ki khoyā gayā tujh se faqīrī kā raaz
varna hai māl-e-faqīr saltanat-e-rūm-o-shām

garche hai ifshā-e-rāz ahl-e-nazar kī fuġhāñ
ho nahīñ saktā kabhī sheva-e-rindāna aam

rabt-o-zabt-e-bāhamī ke haa.e vo rāz-o-niyāz
āshiqāna husn thā aur ishq ma.ashūqāna thā

yak-bīñ tirī nazar sifat-e-āshiqān-e-rāz
merī nigāh māya-e-āshob-e-imtiyāz

do gaam mere saath chale rāh-e-ishq meñ
miltā nahīñ hai aisā koī rāz-dāñ mujhe

ai husn jab se raaz tirā pā ga.e haiñ ham
hastī se apnī aur qarīb aa ga.e haiñ ham

tū ne ye kyā ġhazab kiyā mujh ko bhī faash kar diyā
maiñ hī to ek raaz thā sīna-e-kā.enāt meñ

rāste ham se raaz kahne lage
phir to ham rāstoñ meñ rahne lage

vo raaz jo bas us kī nigāhoñ ne paḌhā hai
jī chāhtā hai maiñ use hoñToñ se kahūñ bhī

aa sakegā na lab pe rāz-e-ishq
husn kā ehtirām karte haiñ

hijr meñ muskurā.e jā dil meñ use talāsh kar
nāz-e-sitam uThā.e jā rāz-e-sitam na faash kar

rāz-e-hayāt-o-maut kā uqda jo khol de
mil jaa.e jis se ḳhvāb meñ tābīr ḳhvāb lā

ashk qaabū meñ nahīñ raaz chhupā.ūñ kyūñkar
dushmanī mujh se mire dīda-e-tar rakhte haiñ

zulf-e-mushkīñ ko hinā.ī uñgliyoñ se mat sambhāl
khul chukā hai merī nazroñ par terā rāz-e-jamāl

sitāroñ par khule haiñ raaz dil ke
tirī bāteñ hī bas shab-bhar huī haiñ