Tags-Raaz

aziiz hai jauhar-e-amānat kisī se ulfat ho yā adāvat
agar hai kuchh ġhairat-e-sharāfat to raaz ifshā na kījiyegā

kiyā to hai ishq hazrat-e-dil liyā hai sar par ye bār-e-mushkil
huā agar mudda.ā na hāsil to raaz ifshā na kījiyegā

maiñ agar ḳhāmosh huuñ ḳhāmosh rahne dījiye
merī ḳhāmoshī se kyā kyā hādse haiñ raaz meñ

siine meñ rāz-e-ishq chhupāyā na jā.egā
ye aag vo hai jis ko dabāyā na jā.egā

ye dekheñ rāz-e-dil ab kaun kartā hai ayaañ pahle
nazar kartī hai iz.hār-e-mohabbat yā zabāñ pahle

ye daraḳhtoñ ke saa.e jo chup-chāp haiñ ham mohabbat-zadoñ ke ye hamrāz haiñ
ab yahīñ dekhnā raat pichhle pahar do dhaḌakte diloñ kī sadā aa.egī

raaz hai koī jo mujh par munkashif hone ko hai
kis liye lagtā hai an-dekhā jahāñ dekhā huā

lab-e-ḳhāmosh se ifshā hogā
raaz har rañg meñ rusvā hogā

parda uThne se mirā raaz khulā hai ki tirā
ghar se niklā hai tire saath mirā naam ki tū

rāz-o-niyāz-e-ishq kī kyā ho ḳhabar hameñ
hāsil nahīñ hai dīd-e-ruḳh-e-mahvashāñ talak

maiñ ne kyā ifshā kiyā raaz un kā soch ai ham-nashīñ
bā.is-e-ifshā-e-rāz un kī hayā thī maiñ na thā

ḳhudā kare to kisī raaz kā amiiñ na bane
gumāñ gumāñ hī rahe aur kabhī yaqīñ na bane

usī dam ho ga.ī hairān duniyā
khule jab raaz us kī Diary se

raaz phir raaz nahīñ rahtā hai
rāz-e-dil sab se na kholā jaa.e

raaz thoḌe aao kholeñ us ḳhudā ke 'muntazir'
is zamīñ par āsmāñ kī hukmarānī dekh kar

parda-e-mahmil uThe to rāz-e-vīrāna khule
rāz-e-vīrāna khule tab jā ke dīvāna khule

rāz-e-mohabbat kaise bhalā us ko likkhūñ
ḳhat merā vo dostoñ meñ bhī paḌhtā hai

mahfiloñ meñ ham rafīq-o-rāz-dāñ samjhe ga.e
ghar ke āñgan meñ magar tanhā.iyāñ bote rahe

rūheñ uThīñ gale milīñ vāpas chalī ga.iiñ
is raaz ke chhupāne ko tan par libās thā

parda-nashīñ ke ishq meñ parda-darī na ho kahīñ
hotī haiñ be-hijābiyāñ jān-e-nahufta-rāz meñ