Tags-Raaz

itnā khul kar bhī mire raaz nihāñ haiñ mujh se
saat pardoñ kī tarah hai mujhe uryānī bhī

aur inhīñ barnā.iyoñ ke saath ai ham-rāz-e-jāñ
kis qadar sahmī huī sī talḳhiyāñ dehlī meñ haiñ

ye raaz mujh pe sham.a ke anjām se khulā
kaTtī hai hijr-e-yār meñ kyūñkar tamām raat

baat kā raaz khule baat kā andāz khule
tere hoñToñ se chale dil meñ utartī jaa.e

ye mashiyyat ke raaz haiñ 'shañkar'
ibtidā merī intihā merī

shikast-e-dil kā mire raaz aap kyā jāneñ
malāl hī na huā yā malāl kar na sakā

kisī se ek bhī fitrat kā raaz khul na sakā
agarche daur zamāne kā inkishāfī thā

ye bhī hai qarīna ik shāyad hastī meñ tavāzun rakhne kā
kuchh raaz ayaañ kar logoñ par kuchh haal magar rakh pinhāñ bhī

mujh se shakeb-e-qalb kā sāmāñ na ho sakā
us par bhī dil kā raaz numāyāñ na ho sakā

samajh se duur hai jāñ-dādgān-e-ishq kī manzil
fanā kī god meñ sarmāya-e-rāz-e-baqā samjhe

shahr-e-kotāh meñ sab past-nashīñ past-nishāñ
kis ko hamrāz kareñ kis kā qarīna sīkheñ

jhāñk kar āñkhoñ meñ siine meñ utar kar dekheñ
naqsha-e-dil se koī rāz-e-dafīna sīkheñ

kis ko ma.alūm nahīñ vaqt ke dil kī dhaḌkan
merī hamrāz-o-ham-āhañg rahī hai barsoñ

hazār baar ḳhizāñ se bahār Takrā.ī
chaman kā raaz magar aaj tak khulā to nahīñ

jab tak hai ishq-o-āshiq-o-ma.ashūq meñ tamīz
khultā kisī pe rāz-e-hadūs-o-qidam nahīñ

parda-e-hijr vahī hasti-e-mauhūm thī 'yās'
sach hai pahle nahīñ mālūm thā ye raaz mujhe

'sabīla' tere haqīqat bayān karne se
jahāñ pe rāz-e-junūñ ek din khulegā hī

duniyā meñ ham jo apnī haqīqat ko pā ga.e
to zindagī ke raaz samajh meñ sab aa ga.e

ik kaifiyat-e-rāz hai ġham hai na masarrat
is bazm-e-mohabbat meñ samāñ aur hī kuchh hai

shaitān kartā hai kab kisī ko gumrāh
is raaz se hai ḳhudā-e-ġhālib āgāh