Tags-Raaz

bichhā yaqīñ kā musallā darūn-e-hastī meñ
niyāz-o-rāz ke qisse numūd meñ na rakh

ḳhud-kushī kar lī bhare gulshan meñ jis ne be-sabab
maiñ ne sīkhā hai usī hamrāz se jiine kā Dhab

chal ke ik umr mujh pe raaz khulā
merī manzil hī merā jaada thī

kisī pe rāz-e-haqīqat khule tū ḳhaak khule
jab aadmī nahīñ vāqif ki aadmī kyā hai

rāz-e-dil laakh chhupāyā lekin
kah diyā us kī adā ne kyā kyā

ban ga.e dil ke fasāne kyā kyā
khul ga.e raaz na jaane kyā kyā

raaz to nā huā jo batlā duuñ
varna tū achchhā rāz-dāñ to hai

yahī hai maslahat intihā-e-rāz 'aḳhtar'
jahāñ meñ rasm-e-mohabbat na aam ho jaa.e

har apnī dāstāñ ko kahā dāstān-e-ġhair
yuuñ bhī kisī kā raaz chhupāte chale ga.e

yaqīñ āsār lamhoñ par jo sach pūchho to raaz ab tak
hukūmat vahm hī kī hai tasallut ḳhvāb hī kā hai

taras ga.e haiñ ki khul kar kisī se baat kareñ
har āshnā hameñ ġhairoñ kā rāzdāñ hī lage

raaz jo sīna-e-fitrat meñ nihāñ hotā hai
sab se pahle dil-e-shā.ir pe ayaañ hotā hai

marne ke baad khul ga.iiñ saarī haqīqateñ
jo zindagī meñ raaz thā afsāna ho gayā

lab pe aatī baat rah jaatī laboñ ke darmiyāñ
aam mat kar rāz-e-dil kah roktī pāgal havā

dekh kar bhī na kabhī jaan sake husn kā raaz
ishq ko ilm se begāna samajhne vaale

kah to ga.ī vo nīchī nigāh
raaz hī rakhnā rāz-e-hayāt

ek rasmī sā ta.āruf thā mulāqāt na thī
aur ham saada use raaz meñ rakkhe hue haiñ

mirī baqā kā raaz hai musāfirat musāfirat
so naqsh-e-pā baġhair mere sāz-o-raḳht meñ nahīñ

'nasīr' un kī samajh meñ bhī kuchh nahīñ aayā
jo aa rahe haiñ mujhe rāz-e-ishq samjhāne

aise khilā vo phuul sā chehra phailī saare ghar ḳhushbū
ḳhat ko chhupā kar paḌhne vaalī raaz chhupānā bhuul ga.ī