Tags-Rang

rañg laa.ī nā āḳhir tark-e-nāz-bardārī
haath joḌ kar us ko mahv-e-iltijā paayā

rañg apne jo the bhar bhī kahāñ paa.e kabhī ham
ham ne to sadā radd-e-amal meñ hī basar kī

ruk gayā aa ke jahāñ qāfila-e-rañg-o-nashāt
kuchh qadam aage zarā baḌh ke makāñ hai merā

rañg-e-sohbat badalte jaate haiñ
saath ke yaar chalte jaate haiñ

āñsuoñ meñ alam kā rañg na thā
qahqahoñ meñ ḳhushī kī baat na thī

chaman chaman tire aariz ke rañg-e-hasrat ne
ba-chashm-e-gul mizha-e-ḳhūñ-chakān khol diye

laboñ kī bhīgī bhīgī silvaToñ ko muzmahil kar de
numāyāñ rañg-e-peshānī pe aks-e-soz-e-dil kar de

is soñdhī miTTiyoñ ne diyā rañg o zā.iqa
hīroñ se baḌh ke aab meñ mulkī anaaj hai

kis ne Daalī hai fazāoñ pe ye mailī chādar
shab ke māthe pe lahū-rañg nishāñ hai kaisā

jhiil ke paar dhanak-rañg samāñ hai kaisā
jhilmilātā huā vo aks vahāñ hai kaisā

jo mere ḳhvāb meñ rahī paikar-e-rañg-e-nūr thī
ye to lahūluhān hai ye to mirī sahar nahīñ

gul-e-shāḳh-e-mohabbat par lahū kā rañg khiltā hai
ki ab rañg-e-hinā zikr-e-lab-o-ruḳhsār aa.egā

huī ye hāl-e-zabūñ kī shohrat ki us ne ḳhajlat se muñh chhupāyā
banā hai rañg-e-shikasta merā bahut dinoñ meñ naqāb-e-āriz

isī liye rah ga.ī haiñ āñkheñ ki mere miTne kā rañg dekheñ
sunūñ vo bāteñ jo hosh uḌā.eñ isī liye haiñ ye kaan baaqī

ye rañg-e-bazm-e-adū to dekho ki laakh parde kiye haiñ haa.il
naqāb uThā.e vo go haiñ baiThe magar hai ġhairat hijāb-e-āriz

dil kī har aarzū hai ḳhvābīda
ab na vo kaifiyat na soz na rañg

ham ko parvāna o bulbul kī raqābat se ġharaz
gul meñ vo rañg nahīñ sham.a meñ vo nuur nahīñ

bhaḌaktā hai shola sā rañg-e-sukūt
qalandar ke lahje meñ be-bākī hai

masnad-e-naġhma se ik rañg-e-tabassum ubhrā
khilkhilātī huī ġhuncha-dahnī yaad aa.ī

dil kā kyā rañg hai tum phir bhī na samjhe afsos
chashma-e-chashm se ḳhūnāb ubalte dekhā