Tags-Rang

falak pe DhūñDte haiñ gard-e-rañg-e-rafta-e-dil
zamīñ pe shām-e-talab kā nishāñ banāte haiñ

ham bhī badal ga.e tirī tarz-e-adā ke saath saath
rañg-e-hinā ke saath saath shoḳhī-e-pā ke saath saath

us ko DhūñDne meñ jab bhī rañg bharā
ham ne to is dil ko bhī ik manzar jaanā

shānoñ pe ab to kākul-e-shab-rañg khol de
bikhrī huī hai zulf-e-tamannā tire liye

aa fasl-e-gul hai ġharq-e-tamannā tire liye
Duubā huā hai rañg meñ sahrā tire liye

gar rañg bhabūkā ātish hai aur biinī shola-e-sarkash hai
to bijlī sī kauñde hai parī aariz kī chamak phir vaisī hī

thī chehre kī rañgat to nazroñ ke aage
chalā rañg dil kā pata rafta rafta

un kī nazar meñ kyā kareñ phīkā hai ab bhī rañg
jitnā lahū thā sarf-e-qabā kar chuke haiñ ham

apne afkār-o-andāz nayā detā huuñ
ḳhushk manzar meñ hasīñ rañg milā detā huuñ

be-sāl-o-sin zamānoñ meñ phaile hue haiñ ham
be-rañg-o-nasl naam meñ tū bhī hai maiñ bhī huuñ

abas ġhurūr hai mañgvā ke aa.ina dekho
vo rañg-o-rūp nahīñ ab vo sin o saal nahīñ

tum to ai mehrbān anūThe nikle
jab aan ke paas baiThe rūThe nikle

naġhme kī rut naġhme kī fazā phir dhuum machā.ī holī ne
phir Dhol bajā phir rañg uḌā phir dhuum machā.ī holī ne

har chehra hai luthḌā luthḌā phir dhuum machā.ī holī ne
phir Dhol bajā phir rañg uḌā phir dhuum machā.ī holī ne

mausam hai na khāne-pīne kā phir dhuum machā.ī holī ne
phir Dhol bajā phir rañg uḌā phir dhuum machā.ī holī ne

ūdham sā hai galiyoñ meñ machā phir dhuum machā.ī holī ne
phir Dhol bajā phir rañg uḌā phir dhuum machā.ī holī ne

holī kī jaltī aag ke din
ye rañg ke din ye raag ke din

phir ġhaT ġhaT bhañg kā daur chalā phir dhuum machā.ī holī ne
phir Dhol bajā phir rañg uḌā phir dhuum machā.ī holī ne

hai rāg-rañg ruup nayā phir dhuum machā.ī holī ne
phir Dhol bajā phir rañg uḌā phir dhuum machā.ī holī ne

phir daftar-e-raqs-o-rañg khilā phir dhuum machā.ī holī ne
phir Dhol bajā phir rañg uḌā phir dhuum machā.ī holī ne