Tags-Rang

tumhāre rañg mujh meñ aur gahre hote jaate haiñ
maiñ Dartā huuñ

asīr-e-dām-e-junūñ haiñ hameñ rihā.ī kahāñ
ye rañg o bū ke qafas apne saath chalte haiñ

vo rañg-e-kuhan tumhāre āshiq meñ nahīñ
uljhā huā ab vo tarz-e-sābiq meñ nahīñ

parde meñ rañg-o-bū ke safar-dar-safar 'munīr'
in manziloñ se kaise guzar jaa.e aadmī

rañg bahut se aur bhī haiñ
har shai kab hai safed o siyāh

zaḳhm ke rañg haiñ kyā merī ridā jāntī hai
kis ne kī kis se vafā ḳhud ye vafā jāntī hai

daaġh hone lage zāhir mere
tez kar rañg musavvir mere

rañg aur ḳhushbū kī mānind hai merā sarāpā bhī sāhib
qaid rakhegā āḳhir kab tak vaqt mujhe yuuñ muTThī meñ

terī āñkhoñ meñ ka.ī rañg jhalakte dekhe
sādgī hai ki jhijhak hai ki hayā hai kyā hai

chalī jo āñdhī to har kalī ne jhukā ke sar ko ye iltijā kī
chaman ke mālik hamāre ruḳh se abhī na rañg-e-shabāb utre

kartī haiñ ḳhuun charḳh butoñ kī ta.alliyāñ
rañg-e-shafaq lagātī hai saqf-e-kunisht meñ

shafaq jab phuul kar rañg-e-hinā thī
aur havā ke lab sile the

kahīñ is ālam-e-be-rañg-o-bū meñ bhī talab merī
vahī afsāna-e-dumbāla-e-mahmil na ban jaa.e

kaisī hadīsh-e-rañg-o-bū zikr-e-jamāl-o-nūr kyā
husn hī jab na aa sakā dā.ira-e-ḳhyāl meñ

kaif nasīb ab kahāñ ġhunchoñ ke bhī jamāl meñ
kis ne ye rañg bhar diyā sādgī-e-ḳhayāl meñ

chaman meñ iḳhtilāt-e-rang-o-bū se baat bantī hai
ham hī ham haiñ to kyā ham haiñ tum hī tum ho to kyā tum ho

shikast-e-dil kī sadā huuñ bikhar bhī jaane de
ḳhutūt-o-rañg kī zanjīr mat pinhā mujh ko

kyuuñ mahv-e-sar-e-pindār huā ai musht-e-ḳhāk hai naqsh-e-fanā
duniyā meñ kahāñ hai rañg-e-baqā jamshed nahīñ maġhfūr nahīñ

har rañg meñ hai vo jalva-numā tū ek hijāb meñ jā ke chhapā
kyuuñ kor savād huā hai batā kyā āñkhoñ meñ tire nuur nahīñ

mastūr jo thā manzūr huā vo jalva-e-rañg-e-zuhūr huā
jo hijāb thā ruḳh se duur huā mushtāq-laqā mahjūr nahīñ