Tags-Rang

mahak uThe rañg-e-surḳh jaise
khile chaman meñ gulāb itne

ham haiñ nairañgī-e-bahār ke rañg
naḳhl-o-barg-o-gul-o-samar haiñ ham

rañg-e-rukHsār ḳhūb-rūyāñ haiñ
āh-e-ushshāq ke asar haiñ ham

ishq se hai faroġh-e-rañg-e-jahāñ
ibtidā ham haiñ intihā haiñ ham

jī tarastā hai phir un lamhoñ ko jab yakjā the sab
raqs-e-mai bū-e-saman rañg-e-shafaq taaza havā

ye kaisā ḳhuuñ hai ki bah rahā hai na jam rahā hai
ye rañg dekhūñ ki dil jigar kā fishār dekhūñ

ġhubār-e-rañg-e-talab chhaT gayā to kyā dekhā
sulagtī ret ke sahrā meñ ik sarāb thā vo

nahīñ hai ashk se ye ḳhūn-e-nāb āñkhoñ meñ
bharā hai rañg se tere shahāb āñkhoñ meñ

isī liye to nahīñ mo'tabar zamāne meñ
ki rañg-e-sūrat-e-duniyā nahīñ badalte ham

barahnagī ko tamāshā bhī dardnāk milā
badan ke rañg jab utre khañDar nikal aayā

ye husn-o-latāfat ye ḳhushbū ye rañg-e-fazā ye josh-e-numū
aalam hai anokhā kaliyoñ kā duniyā hai nirālī phūloñ kī

mausam mausam yahī rahā gar ḳhushbū kī tahqīr kā rañg
siise kī kaliyāñ phūTeñgī ab lohe kī Dāloñ meñ

tunuk-mizāj hai saaqī na rañg-e-mai dekho
bhare jo shīsha chaḌhāo ki jashn kā din hai

kyā milā naġhm-o-rañg ke shauq se sher ke zauq se
ik chubhan ik dukhan ek vāmāñdgī niiñd aane lagī

jo rañg-e-husn-e-ḳhāmoshī hai vo khotī hai goyā.ī
huā jab lab-kushā ġhuncha to bāhar bū nikal aa.ī

le arsh se tā-farsh na.e rañg na.e Dhañg
har shakl ajā.ib hai har ik shaan tamāshā

tū jo badle tirī tasvīr badal jaatī hai
rañg bharne meñ suhūlat nahīñ hotī mujh ko

'az.har' tirā nasīb hai ye shabnamī bahār
chehre pe tū bhī rañg-e-ḳhizāñ mal ke dekh le

haamī bharī thī dil ne taġh.īr-e-rañg dekho
jab tak laboñ pe aa.ī inkār ho ga.ī hai

zarā sī der bhī ruktā to kuchh patā chaltā
vo rañg thā ki thī ḳhushbū sahāb sā kyā thā