Tags-Rang

tum ne dekhā hai kabhī ghar ko badalte hue rañg
aao dekho na tamāshā mire ġham-ḳhāne kā

chashm-e-sāqī asar-e-mai se nahīñ hai gul-rañg
dil mire ḳhuun se labrez hai paimāne kā

soyā to aañkh meñ tire sapne samā ga.e
jaagā to rañg ḳhvāb ke yaksar badal ga.e

mauj-e-gul bād-e-sabā rañg-e-chaman āb-e-ravāñ
saare aalam meñ agar hai to chalan us kā hai

phuul to phuul haiñ kāñToñ kī ravish bhī us kī
bāġhbāñ kuchh bhī kahe rañg-e-chaman us kā hai

khulā hai is pe kuchh aise bahār kā mausam
hai ruḳh pe rañg qabā meñ patañg uḌtī hai

chaman ko aur hasīñ-tar banānā hai 'manshā'
to rañg-e-kārī-e-ḳhūn-e-jigar zarūrī hai

kyā ḳhabar koī rañg bhar hī de
chand ḳhāke banā ke baiThā huuñ

un ke ḳhirām-e-nāz ko bū-gul-o-sabā kahā
ham ne misāl dī magar rañg na thā misāl meñ

tere shabāb ne kiyā mujh ko junūñ se āshnā
mere junūñ ne bhar diye rañg tirī shabāb meñ

ab kī fasl-e-bahār se pahle
rañg the gulistāñ meñ kyā kyā kuchh

'ravāñ' kis ko ḳhabar unvān-e-āġhāz-e-jahā.an kyā thā
zamīñ kā kyā thā naqsha aur rañg-e-āsmāñ kyā thā

gar yahī rañg hai zamāne kā
baaz aayā maiñ kufr o īmāñ se

ban ke jazīra ubhregā kirdār ḳhud tirā
ḳhush-rañg ḳhvāhishoñ ke tū sailāb se nikal

'ḳhālid' ufuq-e-ḳhāk rahā rañg meñ ġhaltāñ
mujh tak kabhī le kar tirī baas aa.ī na duniyā

koī āvāz hai vo koī saaz hai us se hī rañg-o-nik.hat kā dar baaz hai
jis taraf ho nazar vo rahe jalva-gar kaise socheñge ham phir kisī ke liye

us kī nazreñ bhāñp letī haiñ tujhe har rañg meñ
kis balā kī hoshiyārī tere dīvāne meñ hai

ghaḌī ghaḌī meñ badaltā hai rañg ai 'hātim'
hamesha bū-qalamūñ hai jahān kī sūrat

ab to hañs hañs ke lagātā hai vo mehñdī lekin
ḳhuun rulā degā use rañg-e-hinā mere ba.ad

kisī kī āh-e-sozāñ kā dhuāñ gardūñ pe raqsāñ hai
kisī kā ḳhūn-e-dil rañg-e-shafaq meñ jalva-afshāñ hai