Tags-Rang

bikhre hue haiñ dil meñ mirī ḳhvāhishoñ ke rañg
ab maiñ bhī ik sajā huā bāzār ho gayā

pahle to bas lahū pe ye ilzām thā magar
ab āñsuoñ kā rañg bhī kachchā nikal gayā

ġham-e-hastī kā 'asad' kis se ho juz marg ilaaj
sham.a har rañg meñ jaltī hai sahar hote tak

āshiqī sabr-talab aur tamannā betāb
dil kā kyā rañg karūñ ḳhūn-e-jigar hote tak

pahle to dhanak-rañg meñ Duubā ufuq-e-jāñ
phir manzar-e-hijrāñ bhī tab-o-tāb meñ aayā

vahī fasurda sā rañg-e-mahfil vahī tirā ek aam jalva
mirī nigāhoñ meñ baar sā thā mirī nigāhoñ meñ baar sā hai

sādgī kī intihā kar dī javānān chaman
umr bhar rañg mizāj bāġhbāñ dekhā kiye

abhī harfoñ meñ rañg aate kahāñ se
abhī maiñ ne use likkhā nahīñ thā

kal shab is dhartī par maiñ thā yā phir chāñd sitāre the
ik manzar thā tanhā maiñ aur chāroñ or sunahre rañg

ġhaur karo to chehra chehra oḌhe gahre gahre rañg
jag-album meñ bhare paḌe haiñ andhe gūñge bahre rañg

puurā chāñd aur harā samundar lahroñ kā vo raqs huā
mauj mauj nashshe meñ 'rāshid' lahr lahr meñ lahre rañg

vahshī kirneñ phuul badan se mahak churāne aatī haiñ
jab tak phuul ke dam meñ dam hai tanhā degā pahre rañg

terī yaad bhī dhul jā.egī is mausam kī bārish meñ
barkhā-rut meñ dīvāroñ par āḳhir kab tak Thahre rañg

baḳhshe hai jalva-e-gul zauq-e-tamāshā 'ġhālib'
chashm ko chāhiye har rañg meñ vā ho jaanā

aks-e-mai ho ki jalva-e-gul ho
rañg-e-rukHsār tak nahīñ pahuñchā

rañg kā haala ḳhushbū kā ik jhoñkā kuchh to mile
kab se haiñ āvāra-e-gulshan chāñd havā aur maiñ

rañgīñ kiye haiñ yaar ne jaise ki dast-o-pā
kyā rañg lā rahī hai hinā kuchh na pūchhiye

rañg aa jaatā thā un kī diid se ruḳh par mire
dekh kar ab vo bhī mujh ko surḳh-rū hone lage

'shāhid' daroġh-goī-e-gulzār par na jā
titlī se pūchh rañg-fishānī fareb hai

rañg apne apne vaqt pe khulte haiñ aañkh par
avval fareb hai koī saanī fareb hai