Tags-Rang

maiñ ne kyā rañg sajā.e the tire ḳhvāboñ meñ
aur tū kaise sarāboñ meñ mujhe le ke chalā

gulshan meñ ḳhizāñ ab aa pahuñchī mai-ḳhāne meñ jī kyuuñ kar bahle
vo rañg nahīñ vo lutf nahīñ vo daur nahīñ vo jaam nahīñ

har rañg meñ isbāt-e-safar chāhiye 'sarvat'
miTTī pe dharo paañv samundar se nikal kar

vo rañg bhī uḌe jo nazar meñ na the kabhī
vo ḳhvāb bhī luTe jo qarīn-e-qayās the

fishār-e-husn se āġhosh-e-tañg mahke hai
sabā ke lams se phūloñ kā rañg mahke hai

shakar-laboñ ke tabassum kī baat kyā 'tanvīr'
nafas nafas meñ mai-e-lāla-rañg mahke hai

lahū ke phūloñ se ārāsta hai teġh-e-sitam
shafaq shafaq jo ye maqtal kā rañg mahke hai

tumhārī soch meñ maiñ rañg apne bhar na sakā
ye sochtā huuñ to sharmindagī sī lagtī hai

mujhe us junūñ kī hai justujū jo chaman ko baḳhsh de rañg o bū
jo naved-e-fasl-e-bahār ho mujhe us nazar kī talāsh hai

jin āñkhoñ kī jhīleñ kañval khilātī haiñ
rañg sunahrā un jhīloñ kā mujh meñ hai

kyuuñ chup haiñ vo be-bāt samajh meñ nahīñ aatā
ye rañg-e-mulāqāt samajh meñ nahīñ aatā

kitne uljhe kitne sīdhe
raste un ke rañg-mahal ke

parvāna hai dīvāna lau sham.a kī tharrā.ī
kyā rañg-e-vafā laa.ī ik pal kī shanāsā.ī

rañg aur nuur ke dhāroñ kī tamannā kī thī
maiñ ne chāñd aur sitāroñ kī tamannā kī thī

nanhe paudoñ ke hāthoñ meñ rañg-birañge jaam
chatnāre peḌoñ pe girtī chiḌiyoñ kā kohrām

nahā rahī hai dhanak zindagī ke sañgam par
purāne rañg na.ī raushnī se khelte haiñ

tishna-e-ḳhūñ haiñ la.al-e-lab tere
surḳhī-e-rañg-e-pān meñ kuchh hai

har rañg tire rañg meñ Duubā huā niklā
har naqsh tirā naqsh-e-kaf-e-pā nazar aayā

kasrat meñ bhī vahdat kā tamāshā nazar aayā
jis rañg meñ dekhā tujhe yaktā nazar aayā

havā.eñ chaltī haiñ thamtī haiñ bahne lagtī haiñ
na.e libās na.e rañg-rūp saj-dhaj se