Tags-Rang

ajab thī eid-e-ḳhumistāñ ajab thā rañg-e-nashāt
kisī ne bāda-o-sāġhar kisī ne ashk piye

qadr-o-qīmat dil kī hai jab tak hai is meñ mauj-e-dard
jis meñ rañg-o-bū us gul kī kuchh vaq.at nahīñ

aise khultā thā kahāñ rañg-e-jahāñ
terī tasvīr banāne se khulā

tilā.ī-rañg ye kyā kyā chale haiñ talvāreñ
kisī ke qabze meñ vo kunj-e-zar nahīñ aatā

khulī kitāb thī phūloñ-bharī zamīñ merī
kitāb merī thī rañg-e-kitāb us kā thā

na hargiz ḳhuuñ rulā.e bulbuloñ ko baaġh meñ ai gul
jo apne husn ko tū tā.ir-e-rañg-e-hinā samjhe

ik sabz rañg baaġh dikhāyā gayā mujhe
phir ḳhushk rāstoñ pe chalāyā gayā mujhe

kyuuñ zard hai rañg kis liye aañsū laal
kis vāste har ghaḌī rahe hai tū niDhāl

hai un ke sarāpā kī tarah ḳhush-qad o ḳhush-rañg
vo sarv kā paudā jo sar-e-rāhguzar thā

aaj rañg-e-shafaq ajiib sā thā
dil kī tasvīr sī utar aa.ī

ujlī ujlī sī fazā meñ rañg bikhre pyaar kā
husn-kāroñ ko mirā ehsās-e-tābānī mile

likh likh ke 'nazīr' is ġhazal-e-tāza ko ḳhūbāñ
rakh leñge kitāboñ meñ ye rañg-e-par-e-tā.er

ab laakh ḳhizāoñ kā mausam bhī kuchh na guloñ kā kar paa.e
ham ḳhūn-e-jigar se gulshan kā har rañg nikhārā karte haiñ

mere rañg-e-kafan kī shoḳhī dekh
yuuñ hī āshiq tirā sañvartā hai

tā-kujā ai āgahī rañg-e-tamāshā bāḳhtan
chashm-e-vā-gardīda āġhosh-e-vidā-e-jalva hai

sālik hai kyuuñ taḳhayyul-e-tark-e-vajūd meñ
naqsh-e-suvar kā rañg hai tere shuhūd meñ

ḳhvāb-hā-ḳhvāb jis ko chāhā thā
rañg-hā-rañg usī ko bhuul gayā

kis ne lab-e-bām aa ke dikhāyā ruḳh-e-raushan
ḳhurshīd meñ hai rañg charāġh-e-saharī kā

guzashta mausamoñ meñ bujh ga.e haiñ rañg phūloñ ke
darīcha ab bhī merā raushnī ke zāviyoñ par hai

dil ko be-rañg sī mahfil hī faqat bhātī thī
vahī vīrān se chehroñ meñ mujhe le ke chalā