Tags-Rang

lafz ma.anī se gurezāñ haiñ to un meñ rañg bhar
chehra hai be-nūr to us par koī ġhāza lagā

maiñ rañg sajāvaT ke sabhī bhuul chukī huuñ
ab aa ke mirā ruup nikhāre use kahnā

bahār ab aa ke kyā karegī ki jin se thā jashn-e-rañg-o-naġhma
vo gul sar-e-shāḳh jal ga.e haiñ vo dil tah-e-dām bujh ga.e haiñ

hazāroñ rañg us ke ḳhuun ne yāroñ ko dikhlā.e
jab us ne 'mus.hafī' ko apnī teġh-e-nāz se maarā

kise batāte ki manzar nigāh meñ kyā thā
har ek rañg meñ apnā hī bas tamāshā thā

na pūchh pahlī mulāqāt meñ mizāj us kā
vo rañg rañg meñ simTā kiran kiran meñ khulā

rañg-e-arbāb-e-razā-e-pesha mubārak ho tujhe
koī hotā hī nahīñ tujh se ḳhafā merī tarah

thī dastaras-e-fikr meñ vo sā.at-e-ḳhush-rañg
ḳhushbū kā badan thā use chhū kar nahīñ dekhā

rakhe hai rañg kuchh saaqī sharāb-e-nāb ātish kā
muqattar kyā kiyā le kar gul-e-shādāb ātish kā

huī sarsabz jo sohbat meñ 'amānat' kī ġhazal
rañg dushman kā huā rashk se ik baar safed

do qadam fart-e-nazākat se nahīñ chal saktā
rañg ho jaatā hai us kā dam-e-raftār safed

usī ne rañg bhare haiñ tamām phūloñ meñ
vahī shajar ko samar-dār karne vaalā hai

'ravish' ye ḳhush-āhañg rañg-e-ġhazal
dil-āvez hai rañg-e-hasrat ke ba.ad

mere kapḌoñ meñ Tañgā hai
terā ḳhush-rañg libās!

us ne is tarah utārī mire ġham kī tasvīr
rañg mahfūz to rah jaa.eñ pa manzar na rahe

kahīñ abiir kī ḳhushbū kahīñ gulāl kā rañg
kahīñ pe sharm se simTe hue jamāl kā rañg

vo ālam-e-madhoshī vo mastī-e-rindāna
gul-rañg javānī thī kyā hosh-rubā barsoñ

nigāh-e-shauq ko ruḳh par nisār hone do
ye rañg lā.egī kyā kyā bahār hone do

fusūñ ajiib ye ai mausam-e-bahār kiyā
ki ḳhār-zār ko ham-rañg-lāla-zār kiyā

bah ga.e rañg-o-nūr ke chashme
rah ga.iiñ un kī rañgateñ baaqī