Tags-Rang

hai be-tarāsh abhī dast-e-zehn meñ ik naqsh
ki is ke rañg ko maiñ ham-qalam na kar paayā

raqs karte the tire hāthoñ pe kitne aalam
ab to āñkhoñ se mirī rañg hinā kā nikle

rañg-e-mahfil se fuzūñ-tar mirī hairānī hai
pairahan bā.is-e-izzat hai na uryānī hai

rañg kaisā ye chaḌhā hai jo utartā hī nahīñ
tere lauT aane se bhī terī judā.ī na ga.ī

yahī duniyā kā chalan jaan kar ai jān-e-ġhazal
rañg ḳhud par bhī zarūrat se kiyā jaatā hai

rañg sūraj kā sar-e-shām huā jaatā hai zard
us kā bhī ghar na ho vīrān mire ghar kī tarah

jahāñ kī tarah sau sau rañg pal pal meñ badaltā hai
kabhū kuchh hai kabhū kuchh hai kabhū kuchh hai vo bahū-rañgī

bachpan kahāñ tak un kī umañgoñ ko roktā
āḳhir ko rañg phuuT hī niklā shabāb kā

ḳhāk-e-chaman pe shabnam o gul kā ajab hai rañg
sāġhar kisī se chhūT paḌā hai sharāb kā

hazār rañg-e-tamannā hazār pachhtāve
ajab thā zehn meñ ik izhdihām sone tak

adāvatoñ meñ na.e rañg bhar rahā thā vo
baġhal meñ saañp the aur zer-e-āstīñ thī aag

jin se qaa.em thī tirī shoḳh-nigāhī kī adā
rañg-e-mahfil vo junūñ-ḳhez ishāre na rahe

tire badan se jo chhū kar idhar bhī aatā hai
misāl-e-rañg vo jhoñkā nazar bhī aatā hai

haiñ sabaq-āmoz aurāq-e-kitāb-e-gul magar
juz fareb-e-rañg-o-bū kuchh un ke dāman meñ nahīñ

chaar chīzeñ tire muqābil haiñ
rañg ḳhushbū-o-shā.irī duniyā

māyūs ḳhud-ba-ḳhud dil-e-ummīd-vār hai
is gul meñ bū ḳhizāñ kī hai rañg-e-bahār hai

phūloñ meñ ek rañg hai ā.ankhoñ ke niir kā
manzar tamām-tar hai ye fasl-e-zamīr kā

ḳhuun har lamha-e-maujūd kā kartā jā.ūñ
rañg tasvīr-e-shab-o-roz meñ bhartā jā.ūñ

de ga.ī kitnī bahāreñ ek fasl-e-ārzū
rañg-o-bū ko mausamoñ kā ḳhūñ-bahā kah lījiye

tū to hai husn-e-azal aur mirā rañg-e-ġhazal
merī āvāz meñ bhī kuchh to asar jaane de