Tags-Rang

kitne chehroñ ke rañg zard paḌe
aaj sach bol kar himāqat kī

rañg taqdīr kā badal jaa.e
jab vafā mehrbān hotī hai

gulshan-e-dahr meñ sau rañg haiñ 'hātim' us ke
vo kahīñ gul hai kahīñ bū hai kahīñ buuTā hai

ik roz maiñ bhī bāġh-e-adan ko nikal gayā
toḌī jo shāḳh-e-rañg-fishāñ haath jal gayā

tum apne rañg nahāo maiñ apnī mauj uḌuuñ
vo baat bhuul bhī jaao jo ānī-jānī huī

misāl-e-naqsh-e-kaf-e-pā na uTh sake 'tahsīñ'
ba-rañg-e-sabza ham is darja pā.emāl hue

sard-o-be-rañg hai zarra zarra
garmī-e-rañg-e-sadā haiñ yaaro

ye safīne jo ik lahr ke vāste apne apne bahāv meñ bahne lage
ik adhūrī masāfat kī tasvīr meñ phir koī rañg bharne palaT ā.eñge

raftār o sadā gumbad-e-aflāk meñ aa.e
kuchh rañg-e-hayā dīda-e-chālāk meñ aa.e

'shamīm' anjuman-e-ahl-e-zar meñ kyā jaa.eñ
lahū kā rañg jhalaktā hai ābgīnoñ se

rañg laa.ī mirī āñkhoñ kī jalan ai 'jāmī'
kūcha-e-shab se ujāloñ kī havā aatī hai

haiñ ābgīna jaise mirī zindagī ke rañg
tūfāñ se ā.inoñ ko bachātī rahī huuñ maiñ

apne andar dekhtā thā jalva-hā-e-rañg-rañg
jism-e-ḳhākī ko bhī ik shīshe kā ghar samjhā thā maiñ

pāmāl tum ne gar dil-e-āshiq nahīñ kiyā
talvoñ meñ kyuuñ na ḳhuun kā phir rañg aa gayā

sun kar ġhazal ko merī 'jamīla' ne ye kahā
is meñ to sūfiyāna bhī kuchh rañg aa gayā

maiñ kyā karūñ koī tasvīr gar adhūrī hai
maiñ apne rañg to ab us meñ bharne vaalā nahīñ

har samt lahū-rañg ghaTā chhā.ī sī kyuuñ hai
duniyā mirī āñkhoñ meñ simaT aa.ī sī kyuuñ hai

ham ahl-e-fan to shagūfe haiñ rañg o nik.hat ke
kisī gulāb kī sūrat ugā ke dekh hameñ

hamārī baarī ab aanī hai kūza-gar se kaho
ki rañg shoḳh kare ḳhuub ḳhaak ḳhaam lagā.e

mirī shā.erī meñ na raqs-e-jām na mai kī rañg-fishāniyāñ
vahī dukh-bharoñ kī hikāyateñ vahī dil-jaloñ kī kahāniyāñ