Tags-Rang

muñh dekho āshiqoñ ke muqābil huuñ rañg meñ
bāñdhī hai mujh se kis liye tū laag ai basant

in rozoñ meñ hai rañg jo ashkoñ kā gulābī
shāyad ki mire dīda-e-giryāñ meñ lagī aag

uḌ jā.ūñgā jahāñ se āshiq kā rañg ho kar
naqsh-e-qadam nahīñ huuñ jis ko miTā hī deñge

kyuuñ rañg-e-surḳh terā ab zard ho gayā hai
tū hī magar hamārā hamdard ho gayā hai

dūdhiyā husn se uktā ke mirī nazroñ ne
jab bhī dekhā hai tire rañg kā bharpūr nikhār

baat meñ kohna rivāyāt kā lutf
haath par rañg-e-hinā baaqī hai

dil pahlū meñ jal rahā hai jaise
ye kaisī bahār-e-rañg-o-bū hai

vo dast-e-ḳhizāñ se bach gayā hai
jis phuul meñ rañg hai na bū hai

nikhrā ḳhizāñ se rañg-e-bahārāñ hai in dinoñ
vīrāniyoñ se baḌh ke gulistāñ hai in dinoñ

is meñ sher-o-shā.erī hai is meñ raqs-o-rañg bhī
hiir vāris-shāh kī bhī hai rabāb-o-chañg bhī

hameñ us kī ḳhushbū se kyā
rañg hī baaqī rah jaa.e to bahut hai

ye raas rañg ye mel milan ik haath meñ chāñd ik meñ sūraj
ik raat kā mauj maza saarā ik din kā sair-sapāTā hai

mire bedrōm meñ zero ke balb kii...
lahū-rañg raushnī sahmī huī hai

koī shāḳh-e-tishna-o-ḳhushk jis se harī na ho vo sahāb kyā
jo chhalak ke rañg na bhar sake rag-o-resha meñ vo shabāb kyā

ba-rañg-e-shīsha thā pahle ab ek patthar huuñ
nazar se apnī jo tū ne girā diyā hai mujhe

maiñ tire pyaar ko duniyā se chhupā.ūñ kaise
rañg āñkhoñ se barastā hai shanāsā.ī kā

lagā huā huuñ usī rañg ko ubhārne meñ
abhī ġhazal meñ jise ḳhaal ḳhaal dekhtā huuñ

fasāna tirī zulf-e-shab-rañg kā
baḌhegā jahāñ tak baḌhā.eñge ham

tashbīh maiñ jis dil ko na dī ka.aba se so dil
ab ishq-e-mai-o-muġh se hai ham-rañg-e-ḳharābāt

vādī-e-taḳh.īl to be-rañg thī ik umar se
gum-shuda yādoñ ke ye paikar kahāñ se aa ga.e