Tags-Rang

habs hotā gayā ḳhumār apnā
rañg uḌte ga.e havā ho kar

siyāh rañg chamaktī huī kanārī hai
pahan lo achchhī lageñgī ghaTā.eñ bhejī haiñ

sūraj kī ik kiran ko tarastā hai lafz lafz
merī ġhazal ke chehre pe rātoñ kā rañg hai

nahīñ būḌhoñ kī dāḌhī par miyāñ ye rañg vasme kā
kiyā hai un ke ek ek baal ne mātam javānī kā

gul ne hazār rañg-e-suḳhan sar kiyā vale
dil se ga.iiñ na bāteñ tirī pyārī pyāriyāñ

āñkheñ mal mal kar dekheñge ḳhvāb hai kyā
aise rañg dikhā.egī duniyā ik din

nigāh-e-shauq ne donoñ jahāñ ko chhān liyā
milā na rañg koī jalva-gah-e-yār ke ba.ad

varaq varaq pe hai bikhrā mire vajūd kā rañg
ye kis ke haath kī likkhī huī kitāb hai ishq

nashsha-e-shauq-e-rañg meñ tujh se judā.ī kī ga.ī
ek lakīr ḳhuun kī beach meñ khīñch dī ga.ī

zindagī motiyoñ kī Dhalaktī laḌī zindagī rañg-e-gul kā bayāñ dosto
gaah rotī huī gaah hañstī huī merī āñkheñ haiñ afsāna-ḳhvāñ dosto

naqsh saare ḳhaak ke haiñ sab hunar miTTī kā hai
is dayār-e-rañg-o-bū meñ bast-o-dar miTTī kā hai

vo āñkheñ qahr meñ bhī kar ga.iiñ mujhe shādāb
faroġh-e-bāda meñ rañg-e-jamāl aisā thā

ab dhanak ke rañg bhī un ko bhale lagte nahīñ
mast saare shahr vaale ḳhuun kī holī meñ the

ba-rañg-e-ḳhvāb maiñ bikhrā rahūñgā
tire inkār jab chuntā rahūñgā

aur phir phail gayā rang-e-mohabbat ruḳh par
lāla-e-zaḳhm liye yaar kī yaarī aa.ī

bazm-e-yārāñ meñ yahī rañg to dete haiñ maza
koī ro.e to hañsī se koī dohrā ho jaa.e

hairāñ hai zamāne meñ kise apnā kahe dil
chehre to haiñ gul-rañg magar khoT bhare dil

zamīñ se āsmāñ tak tū ne jo jo rañg rañge haiñ
ye rañg-āmeziyāñ koī dikhā saktā hai kyā qudrat

mire hāthoñ meñ bhī hai saaz lekin
abhī maiñ rañg-e-mahfil dekhtā huuñ