Tags-Rang

rañg-e-chaman se vāsta us ko kahāñ rahā
raqs-e-junūñ meñ gum hai jo tā.ūs aaj tak

ḳhush-rañg kis qadar ḳhas-o-ḳhāshāk the kabhī
zarre bhī zeb-o-zīnat-e-aflāk the kabhī

mujhe kaise dasht meñ laa.e tum ki sadī sadī ke safar pe bhī
vahī rañg-o-nasl kī vahshateñ vahī mā-o-man kī udāsiyāñ

sadā rañg-e-mīnā chamaktā rahā
hamesha ye sabza lahaktā rahā

vahī rañg-o-nūr kī bārisheñ vahī phuul haiñ vahī ḳhushbueñ
mire ham-safīr kahāñ ga.e mire ham-jalīsoñ kā kyā huā

ye rañg jo nazar aatā hai chehra-e-gul par
hamāre ḳhūn-e-jigar ke sivā kuchh aur nahīñ

dekh kar mere dil kī barbādī
kaun shaidā-e-rañg-o-bū hogā

nigāh laao jo rañg-e-sadā kashīd kare
ki maiñ to ḳhāmoshiyoñ ke hunar sunātā huuñ

vo raushnī kā havāla vo rañg-o-bū kā safīr
marī jamāl-pasandī kahīñ se laa.e use

'sājid' nigāh Dāliye ab ird-gard bhī
zikr-e-rumūz rañg-e-asātīr ho chukā

apnī sannā.ī kī tujh ko laaj bhī hai yā nahīñ
ai musavvir dekh rañg uḌne lagā tasvīr kā

sabza-e-nau-rasta kī ḳhushbū thī sāhil par 'munīr'
bādaloñ kā rañg chhatrī kī tarah sar par khulā

vajūd-e-zan se hai tasvīr-e-kā.enāt meñ rañg
isī ke saaz se hai zindagī kā soz-e-darūñ

ilāhī ḳhair ho kuchh aaj rañg be-Dhab hai
tapak rahā hai ka.ī din se aabla dil kā

jo bhī rañg hai terā bas vahī ġhanīmat hai
chehre kab nikharte haiñ muñh pe ḳhaak malne se

shaam ke rañgoñ meñ rakh kar saaf paanī kā gilās
āb-e-sāda ko harīf-e-rañg-e-bāda kar liyā

Dūbne lagtī hai jab rañg ke sailāb meñ aañkh
yaad tab us kī bachā letī hai jaadū kī tarah

zikr thā rañg-o-bū kā aur dil meñ
terī tasvīr utartī jaatī thī

bas ek manzar-e-ḳhālī thā merī āñkhoñ meñ
nigār-e-ḳhāna-e-rañg-e-hinā ke hote hue