Tags-Rang

raushan raushan rañg nirāle kaise nādir kitne habāb
qulzum-e-hastī raqs meñ thā yā ek tamāshā paanī meñ

pyaar ke rañg-mahal barsoñ meñ tayyār hue
aur ik lamhe meñ ġhā.eb dar-o-dīvār hue

shafaq ke rañg meñ hai qatl-e-āftāb kā rañg
ufuq ke dil meñ hai ḳhanjar lahū-luhān hai shaam

us kī tārīf meñ jab koī kahī jaa.e ġhazal
kuchh na kuchh rañg qasīde kā jhalaktā hogā

muTThī meñ to rañg the hazāroñ
bas haath se ret bah rahī thī

sar-e-ḳhār se sar-e-sañg se jo hai merā jism lahū lahū
kabhī tū bhī to mire sañg-e-mīl kabhī rañg mere safar ke dekh

sat-rañgī sapnoñ meñ chehra sat-rañgī ho jaa.e hai
indr-dhanush kā rañg milā hai tumre naam kī haldī meñ

kabhī to ashk meñ ḳhūn-e-jigar kā rañg-e-hayāt
kabhī to aah meñ dil kī dabī huī āvāz

jalva-o-parde kā ye rañg dam-e-nazzāra
jis tarah adh-khule ghuñghaT meñ dulhan kyā kahnā

nigah-e-nāz meñ ye pichhle pahar rañg-e-ḳhumār
niiñd meñ Duubī huī chandr-kiran kyā kahnā

rañg bharte haiñ vafā kā jo tasavvur meñ tire
tujh se achchhī tirī tasvīr banā lete haiñ

ham lakīreñ kured kar dekheñ
rañg lā.egā kyā ye saal nayā

ik nayā rañg dekhtī hai aañkh
jab bhī letī hai karvaTeñ titlī

lahū meñ rañg-e-suḳhan us kā bhar ke dekhte haiñ
charāġh baam se jis ko utar ke dekhte haiñ

hai qayāmat tire shabāb kā rañg
rañg badlegā phir zamāne kā

mujhe to intizār-e-ishq meñ hī lutf aatā hai
kisī kī chāhatoñ kā rañg har dhaḌkan pe taarī ho

jab vo kahtā hai samundar hai kināya us kā
rañg yak-laḳht badaltā hai sarāpā us kā

ai rañg us meñ suud hai terā ziyāñ nahīñ
ḳhushbū uḌā ke le ga.ī zangār ko tire

nahīñ aaj rañg vo ḳhalq kā kabhī ye zamāne kā haal thā
hameñ sar pe apne biThā liyā jo kisī bashar ke chale ga.e

bāda-e-gul-rañg kā sāġhar ināyat kar mujhe
sāqiyā tāḳhīr kyā hai ab ghaTā chhā.ī to hai