Tags-Rang

umiid o aarzū ke rañg kyuuñ phīke lag rahe haiñ ab
kamī hai āb-o-gil meñ kuchh lahū meñ koī baat hai

hai us gul-rañg kā dīvār honā
ki jaise ḳhvāb se bedār honā

terī nigāh-e-nāz ke bismil na hoñge ham
har rañg har fazā meñ to shāmil na hoñge ham

chāñd nikle kisī jānib tirī zebā.ī kā
rañg badle kisī sūrat shab-e-tanhā.ī kā

mere lahū tarañg se Therā hai surḳh-rū
kyā kyā na rañg haiñ tirī āñkhoñ ke ab na pūchh

ye pahlī nazm un ḳhvāboñ kī ḳhātir hai
jo darja ḳhāmushī se haath kī resham lakīroñ meñ panapte ḳhvāhishoñ ko dekh kar ḳhush-rañg khultī haiñ

nuur ke ham ne gale dekhe haiñ ai 'hālī' magar
rañg kuchh terī alāpoñ meñ nayā paate haiñ ham

ḳhud apne hī andar se ubhartā hai vo mausam
jo rañg bichhā detā hai titlī ke paroñ par

rañg laa.ī gilauriyāñ kah kar
laal hoñThoñ pe aur laalī hai

rañg-e-saped-o-siyāh sunahrī sab shakloñ meñ zāhir hoñ
aag se apnī raakh uThā kar sonā chāñdī jast raheñ

mire sheroñ meñ bahtā hai samundar mere virse kā
ki maiñ gulshan-tarāz-e-rañg-e-sohbāñ huuñ na ḳhāqānī

mumkin hai koī baat ġhalat ham se ho ga.ī
yā yūñhī apnā rañg badalne lage haiñ ham

husn meñ ho ishq kī bū ishq meñ ho rañg-e-husn
phir murattab rang-o-bū-e-nau se ik duniyā kareñ

mujh rañg zard uupar ġhusse siiñ laal mat ho
ai sabz shaal vaale uude rumāl vaale

ajnabī hai tire ḳhush-rañg badan kī ḳhushbū
ik zarā lams-e-vafā tujh meñ samoyā jaa.e

har manzar-e-ḳhush-rañg sulag jaa.e to kyā ho
shabnam bhī agar aag hī barsā.e to kyā ho

dil kī dīvār pe uḌte rahe malbūs ke rañg
der tak un meñ tirī yaad kā saayā chamkā

rañg āzād hue gul kī girah khulte hī
ek lamhe meñ ajab baaġh kā chehrā chamkā

bahut se ḳhūn-ḳharābe macheñge ḳhāna-ḳharāb
yahī hai rañg agar tere paan khāne kā

parda-e-sad-rañg-hairat ḳhāna-e-nairañg meñ
kaun hai ā.īna-andar-ā.ina ham se suno