Tags-Rang

shabāb o piirī kā aanā jaanā ġhazab kā pur-dard hai fasāna
ye rah ga.ī ban ke gard-e-hasrat vo uḌ gayā ruḳh se rañg ho kar

hañsī meñ vo baat maiñ ne kah dī ki rah ga.e aap dañg ho kar
chhupā huā thā jo raaz dil meñ khulā vo chehre kā rañg ho kar

ik shaffāf darīche meñ kuchh rañg birañge manzar the
gul-dānoñ meñ phuul farozāñ ātish-dān bhaḌaktā thā

is jahān-e-rañg-o-bū ko maiñ ne samjhā thā sarāb
ik haqīqat thā ye 'ārif' aañkh kā dhokā na thā

ye rañg rañg parinde hī ham se achchhe haiñ
jo ik daraḳht pe rahte haiñ beliyoñ kī tarah

jitnā mazāq-e-ishq sañvartā chalā gayā
rañg-e-tabī.at aur nikhartā chalā gayā

pahle jaisā rañg-e-bām-o-dar nahīñ lagtā mujhe
ab to apnā ghar bhī apnā ghar nahīñ lagtā mujhe

samajh to ye ki na samjhe ḳhud apnā rañg-e-junūñ
mizāj ye ki zamāna mizāj-dāñ hotā

miTā sakī na unheñ roz o shab kī bārish bhī
diloñ pe naqsh jo rañg-e-hinā ke rakkhe the

chaltī hai aa.ine meñ kitne zamānoñ kī havā-e-hairat
ek rañg aatā hai chehre pe to ik rañg uḌā jaatā hai

nigāh-e-nāz jab uThī ajiib kaam kar ga.ī
jo rañg-e-ruḳh uḌā diyā to dil meñ rañg bhar ga.ī

vo jab rañg-e-pareshānī ko ḳhalvat-gīr dekheñge
to apne har tasavvur meñ mirī tasvīr dekheñge

rañg apne jo the bhar bhī kahāñ paa.e kabhī ham
ham ne to sadā radd-e-amal meñ hī basar kī

kisī sūrat ye nukta-chīniyāñ kuchh rañg to lā.īñ
chalo yuuñ hī sahī ab naam to mash.hūr hai merā

apne zehnoñ meñ rachā lījiye is daur kā rañg
koī tasvīr banegī to ye kaam aa.egā

lahū vatan ke shahīdoñ kā rañg laayā hai
uchhal rahā hai zamāne meñ nām-e-āzādī

sahar ke vaqt jab ThanDī havā.eñ sarsarātī haiñ
chaman kā rañg khil jaatā hai kaliyāñ muskurātī haiñ

jo bhī hai ab isī ḳhaak kī fasl hai
rañg aur nasl ke dā.ere se nikal

jab baat vafā kī aatī hai jab manzar rañg badaltā hai
aur baat bigaḌne lagtī hai vo phir ik va.ada karte haiñ

saarī be-rañg soch ke chehre
lafz pahneñ to phir nikharte haiñ