Tags-Rang

shaguft-e-gul kī sadā meñ rañg-e-chaman meñ aao
koī bhī rut ho bahār ke pairahan meñ aao

aañkh meñ ḳhvāb munjamid haiñ
rañg barsāo hausloñ ke

kabhī tujh ko ġhubār-e-rañg meñ koī kiran jaanā
kabhī tujh ko giraft-e-sañg meñ juue ravāñ samjhe

agarche tūfān-e-rañg-o-bū kī sharīr lahroñ se thak chuke haiñ
magar vo dil ke na.e talātum kī zad meñ aanā bhī chāhte haiñ

dil ke varaq-e-sāda pe kuchh rañg ubhāreñ
ḳhūñ-gashta tamannāoñ kī tasvīr utāreñ

qita-e-jāñ ko jalātā huā is dhuup kā rañg
chhāñv se terī lipaT kar nahīñ qaa.em rahtā

ek chhabelī na.ī-navelī naTkhaT chanchal laḌkī
rañg-birañgī poshākoñ meñ mela ghuum rahī hai

asar ye hai ki bulbul jab qafas meñ kartī hai naala
shikast-e-rañg-e-gul kī baaġh se āvāz aatī hai

mujhe apne ruup kī dhuup do ki chamak sakeñ mire ḳhāl-o-ḳhad
mujhe apne rañg meñ rañg do mire saare rañg utaar do

aur phir shaam huii, rañg uḌe, jaam bane
aur phir zikr chhiḌā, thoḌe se ġhamnāk hue

ai dil kī ḳhalish chal yūñhī sahī chaltā to huuñ un kī mahfil meñ
us vaqt mujhe chauñkā denā jab rañg pe mahfil aa jaa.e

din ke des se uḌ aate haiñ merī āñkhoñ meñ
saath nibhānā bhuul ga.e the rañg añdheroñ se

raushnī kā rañg jaise kuchh samajh aatā nahīñ
shahr kī tahzīb kā ruḳh kis taraf hai kyā pata

shahroñ kā virsa haiñ jalte-bujhte manzar
rahnā lekin ham-rañg-e-bāzār na honā

gul-ruḳhāñ kā āb-o-rañg dekhne se mere hai
husn kī gulistāñ kī mujh ko bāġhbānī hai

jo ki terā āshiq hai us kā ai gul-e-ra.anā
rañg-e-zāfrānī hai ashk-e-arġhavānī hai

ḳhūn-e-dil meñ hai nihāñ shola-e-sad-rañg-e-bahār
is gulistāñ meñ haiñ is raaz ke mahram kitne

lāla-o-gul ke tabassum se shafaq phūlegī
har taraf rañg nazar ā.eñge bāham kitne

aks-e-sāqī se chamak uTThī hai sāġhar kī jabīñ
aur kuchh tez huā bāda-e-gulnār kā rañg

vaqt kī ruuh munavvar hai navā se merī
asr-e-nau meñ hai mirī shoḳhī-e-afkār kā rañg