Tags-Rang

rañg-e-mahfil dekhne ko hosh meñ aa.e the ham
hosh ab uḌne lage haiñ rañg-e-mahfil dekh kar

saa.e jhulas ke rah ga.e vaqt kī tez dhuup meñ
merā bhī rañg uḌ gayā terā bhī ruup Dhal gayā

yuuñ to khile haiñ phuul ka.ī rañg ke magar
phīke paḌe haiñ donoñ jahāñ aap ke binā

vo kuchh rañg lā.eñge roz-e-visāl
hinā un ko dekhā hai malte hue

maan bhī jaao ki sar par hai kaḌī dhuup abhī
Dūbtī shaam kā har rañg sunahrā hogā

sub.h-dam rañg nikhrā har ik shāḳh kā
raushnī shabnamī koñpaloñ meñ ga.ī

rañg ab yuuñ tirī tasvīr meñ bhartā jā.ūñ
tujh pe rañg aa.e maiñ jaañ se bhī guzartā jā.ūñ

'iqbāl' jab se phuul haiñ gul-dān ke asiir
ḳhushbū uḌī uḌī sī hai aur rañg zard haiñ

rañg aa jaate muTThī meñ jugnū ban kar
ḳhushbū kā paikar hotā to achchhā thā

thoḌā thoḌā ye jo suhāgan rañg ikaTThā dil meñ huā hai
jaane kitne bhed nichoḌe niiñd gañvā.ī pyaas churā.ī

naġhma bulbul ko rañg-o-bū gul ko
dil-kash-o-ḳhushnumā diyā tū ne

tere jaane se mujh par ye uqda khulā rañg-o-ḳhushbū to bas terī mīrās the
ek hasrat sajī rah ga.ī gul-ba-gul ek mātam chaman-dar-chaman rah gayā

tū shām-rañg huā jā rahā hai sub.h se kyuuñ
jhalaktī hai tirī sūrat se yaas darvāze

vufūr-e-ashk ne kāshāne kā kiyā ye rañg
ki ho ga.e mire dīvār-o-dar dar-o-dīvār

har phuul ke siine meñ gul-e-sañg ho 'sājid'
har sañg meñ ik rañg-e-qalaq chāhiye mujh ko

ajiib rañg kā piñjra hai āsmāñ nīche
tilism-e-ġhaib hai 'ḳhurshīd' haal duniyā kā

ḳhushbū kā koī rañg na paikar na pairahan
tasvīr hai magar tire tarz-e-ḳhirām kī

chehre ke rañg-o-nūr ko merā hunar samajh
mujh ko mirī nazar se kabhī jhāñk kar bhī dekh

tā-hadd-e-nazar phail gayā rañg fazā meñ
ḳhush-rañg vo tahrīr-e-hinā mere liye hai

'azīz' terī mohabbat bhī rañg lā.egī
tamām hogā ġham-e-bekarāñ kabhī na kabhī