Tags-Rang

kufr-o-īmāñ kā ajab rañg hai nairañgī meñ
ye vo nairañg hai kāfir na musalmāñ samjhā

pī rahe haiñ ḳhushnumā shīshoñ meñ log apnā lahū
aur kyā hogā anokhe rañg kā jashn-e-tarab

ham bhāñp ga.e the rañg-e-mahfil
kahne ko to be-ḳhabar ga.e ham

jalve the kisī ke kār-farmā
har naqsh meñ rañg bhar ga.e ham

hasīnoñ par na rañg aayā na phūloñ meñ bahār aa.ī
nahīñ aayā jo lab par naġhma-e-mastāna barsoñ se

letā thā naam ġhair nikal aayā merā naam
āḳhir jhalak gayā hai mohabbat kā rañg-Dhañg

rañg badlā yaar ne vo pyaar kī bāteñ ga.iiñ
vo mulāqāteñ ga.iiñ vo chāñdnī rāteñ ga.iiñ

jitne kamāl-rañg the saare liye ga.e
phir bhī tire jamāl kā naqsha nahīñ banā

us ko tahqīr kī nazroñ se na dekho yaaro
rañg kirdār kā pinhāñ mirī tasvīr meñ hai

qaid-e-ulfat kā maza zulf-e-girah-gīr meñ hai
bas yahī rañg mire ḳhvāb kī ta.abīr meñ hai

maañ kah rahī thī rañg lipstick ke dekh kar
chaT kar diyā bahū ne mire laal kā bajaT

badal ga.ī hai nigāh-e-sāqī to rañg-e-mahfil badal gayā hai
na ab vo pahlī sī mai-kashī hai na vo mazā ab sharāb meñ hai

ek rañg-o-nūr kī duniyā hai mere sāmne
sochtā huuñ is ḳharābe meñ koī apnā bhī hai

mire lahū meñ ab itnā bhī rañg kyā hotā
tarāz-e-shauq meñ aks-e-ruḳh-e-nigār bhī hai

jo terā rañg thā us rañg se na kah paayā
maiñ dil kī baat kabhī Dhañg se na kah paayā

bharte rahe alam meñ fusūn-e-tarab kā rañg
in talḳhiyoñ meñ zahr milāte chale ga.e

ahl-e-dil rahte haiñ tā-zīst vafā ke pāband
sham.a har rañg meñ jaltī hai sahar hone tak

maiñ bhī to rañg-o-bū kā tamāshā karūñ kabhī
qudrat mire chaman ko bhī jalva-numā.ī de

vaj.h-e-be-rañgī-e-har-shām-o-sahar kyā hogī
maiñ ne shāyad tujhe har rañg meñ dekhā hogā

kaal koyal kī sadā.eñ na shafaq rañg kahīñ
shahr meñ jaane kahāñ shām-o-sahar rahte haiñ