Tags-Rang

abhī aur mātam-e-rañg-o-bū ki chaman ko hai talab-e-numū
tere ashk hoñ ki mirā lahū ye amiiñ haiñ fasl-e-bahār ke

'mus.hafī' ke dekh yuuñ chehre kā rañg
ishq ne kyā us kā naqshā kar diyā

ye rañg rañg ke paikar ye tez mausīqī
har ik badan pe ka.ī zaḳhm haiñ thirakte hue

ḳhuuñ shahīdān-e-vatan kā rañg lā kar hī rahā
aaj ye jannat-nishāñ hindostāñ āzād hai

harakat meñ aa ga.e haiñ sabhī rañg-e-ḳhāl-o-ḳhat
un kī nazar ke sehr se tasvīr chal paḌe

rañg mausam se uḌ ga.e saare
canvas par paḌā rahā manzar

sūraj sī us kī tab.a hai sho.ala sā us kā rañg
chhū jaa.e us badan ko to paanī ubal paḌe

koī nahīñ thā magar sāhil-e-tamannā par
havā-e-shām meñ jab rañg-e-indimāl aayā

bahār-e-be-kaif kis liye hai guloñ pe rañg-e-shikast kyuuñ hai
abhī to kitnī hī bijliyāñ haiñ chaman meñ tark-e-chaman se pahle

jhuum kar aaj ye shab-rañg laTeñ bikhrā de
dekh barsāt baḌī der ke ba.ad aa.ī hai

kaisā mujh ko banā diyā 'ammār'
kaun sā rañg bhar ga.e mujh meñ

duniyā se dar-guzar ki guzargah ajab hai ye
darpesh ya.anī 'mīr' hai jaanā jahāñ se bhī

sab se ik tarz judā sab se ik āhañg judā
rañg mahfil meñ tirā jo hai vo ḳhalvat meñ nahīñ

vo musavvir-dar-musavvir kho rahī hai apne rañg
ik dhanak bhaTkī hai kitnā apnā ambar chhoḌ kar

āñkheñ jhapak rahā thā ki manzar badal gayā
kuchh rañg phuljaḌī meñ samā.e nikal ga.e

ye uḌ rahī hai jo ḳhūñ-rañg ḳhaak har jānib
kisī shahīd-e-junūñ kā mazār raah meñ hai

laayā hai rañg ḳhūn-e-shahīdāñ ba-faiz-e-shauq
nazroñ ke sāmne hai gulistāñ khilā huā

ba-rañg-e-sabza unhī sāhiloñ pe jam jaa.eñ
ravāñ hue the jahāñ se vahīñ pe tham jaa.eñ

koī mare kisī ko ḳhushī ho ḳhudā kī shaan
mātam kisī jagah ho kahīñ nāch-rañg ho

gulzār meñ jo duur gul-e-lāla-rañg ho
vo be-hijābiyāñ hoñ ki nargis bhī dañg ho