Tags-Rang

ye sohbateñ bhī dekhiye laatī haiñ rañg kyā
mehmān ḳhaar paañv ke chhāle hue to haiñ

muuñd luuñ aañkh to be-kār hai sab rañg-e-jahāñ
kyā mirī chashm-e-ināyat ke sivā bhī kuchh hai

din bhar jo sūraj ke Dar se galiyoñ meñ chhup rahte haiñ
shaam aate hī āñkhoñ meñ vo rañg purāne aa jaate haiñ

ai sarāpā rañg-nik.hat tū batā
kis dhanak se terā pairāhan banūñ

libās apnā 'fārūq' ḳhush-rañg thā
magar dhuup ne us ko saada kiyā

hazār rañg ke jalvoñ se thī fazā ma.amūr
guzishta raat 'mubārak' nashist aisī thī

tum to ai mehrbān anūThe nikle
jab aan ke paas baiThe rūThe nikle

nahīñ mujh se koī shikva-gila to sach batāo phir
mirī bātoñ ko rañg-e-bad-gumānī kaun detā hai

yuuñ tire shahr meñ badlī hai havā-e-ḳhush-rañg
jitne ma.asūm haiñ chālāk huā chāhte haiñ

har matā-e-nafas nazr-e-āhañg kī ham ko yārāñ havas thī bahut rañg kī
gul-zamīñ se ubalne ko hai ab lahū tum kahāñ jāoge ham kahāñ jā.eñge

hai bikharne ko ye mahfil-e-rañg-o-bū tum kahāñ jāoge ham kahāñ jā.eñge
har taraf ho rahī hai yahī guftugū tum kahāñ jāoge ham kahāñ jā.eñge

ye chaman-zār ye ḳhush-rañg bahāroñ kā jahāñ
zindagī kitnī dil-āvez-o-dil-ārā hai yahāñ

chehre tamām zard haiñ daulat ke rañg se
koThī meñ ho gayā hai sarāpā ayaañ basant

mūbāf zard rañg hai sumbul kī choT meñ
khotā hai bū-e-gul kī pareshāniyāñ basant

ham-rañg kī hai duun nikal ashrafī ke saath
paatā hai aa ke rañg-e-talā.ī yahāñ basant

kartā hai bāġh-e-dahr meñ nairañgiyāñ basant
aayā hai laakh rañg se ai bāġhbāñ basant

maiñ rañg birañgī mornī mire pañkh bahut mumtāz
mirā raqs anokhā raqs hai mujhe apne aap pe naaz

rañg kyā kyā na bhare husn-e-nazar ne lekin
terī tasvīr mukammal tire aane se huī

pahle tere rañg the vahāñ
makḌiyoñ kā jaal rah gayā

chehre kī chāñdnī pe na itnā bhī maan kar
vaqt-e-sahar to rañg kabhī chāñd kā bhī dekh